近年，職場掀起一陣品酒風，尤其是威士忌，以至葡萄酒、清酒及雞尾酒 ( Cocktail )。品酒唔單只係飯局話題，愈來愈多企業為員工提供品酒班、甚至銀行及金融企業喺面試流程中加入Wine tasting環節 / 活動，以測試應徵者的社交及應酬能力與態度。所以話，不論上班族或求職者，掌握基本品酒知識、技巧及禮儀，絕對有助加強職場力。
5大原因：點解要未見工先學酒？
1. 面試加分
除咗正式嘅面試環節，依家愈來愈流行Lunch interview，特別係招募Management Trainee或行政人員嘅面試。由冷冰冰嘅辦公室，轉去人多嘈吵嘅餐廳面試，面試官主要是評估應求職者嘅社交技巧、餐桌禮儀及應變能力。
尤其係Management Trainee，企業視他們為日後管理領導層嘅接班人，經常要代表公司跟客戶、合作伙伴洽談生意，所以學定幾招基本「飲酒功」一定有着數，包括喺餐廳點樣Order酒、如何跟侍應或侍酒師交流、基本飲酒禮儀等。例如order酒時，可以從容地對侍應講：「我可以要杯澳洲的Shiraz紅酒嗎？果味香濃，應該不錯。」面試官見到你對答流暢，表現自信，自然加分。
懂得基本品酒知識及技巧，有助提高職場競增力。
2. 提升社交能力
返工要應酬是常識吧。一班同事Happy hour、食晚飯、見客，難免要飲兩杯。你唔需要變成專家，但起碼Cocktail、葡萄酒、威士忌、清酒等樣樣都識少少。到時識得叫嚟飲，自然留下良好First impression。而且新入職的同事，識飲兩杯容易混熟，有助融入團隊。
3. 擴闊社交圈子
出嚟工作，識人好過識字。而家Social media年代，網上有好多酒局飯聚，參加呢啲局可以識到唔同行業，唔同年紀嘅朋友。大家都以品酒為樂，有共同興趣，好快打成一片。
4. 打造Personal Brand
上班族除咗工作，打造個人形象都好重要。當你對酒有研究，就會慢慢建立有品味嘅形象。下次老闆食飯就會叫你揀酒，同事就會問你配咩食物，咁就自不然提升自己嘅親和力，拉近同事間嘅距離，建立優雅的個人形象。
公司聚會，跟上司及同事除了談公司，亦不妨分享品酒心得及經驗，藉着有趣的話題，更容易跟對方打開話匣子。
5. 商務應酬有更多話題
不論與客戶商務飯局，抑或公司派對上跟老闆、上司以至同事，唔通永遠都講公事及天氣咩！懂得品酒知識，自然多啲吹水話題，又可以藉此了解對方多一啲；例如跟同事Chit chat時，講下自己去酒莊旅遊的經歷，或者一啲葡萄酒冷知識，好似分享一下以前德國Riesling白酒非常有名，比法國波爾多酒還要貴。可是二戰之後德國酒需求減少，平返好多。多啲有趣嘅話題講吓，返工就唔使咁悶啦。
新手懶人包：10大品酒基本功 輕鬆掌握
既然講到品酒日漸成為職場必學知識，但品酒學問又博大精深，所以喺度教大家10個基本重點：
1. 點拎酒杯？
握着酒杯杯柄或杯腳，而唔係杯身或杯肚，以防止手溫整熱杯酒。輕輕搖杯可釋放香氣，但係唔好搖得太大力，避免「浪花四濺」。
緊記要握酒杯杯柄或杯腳，不要杯身或杯肚。
2. 品酒三步曲
波爾多葡萄學院的認可導師Jennie Mack分享，品酒有三大步驟：色 ( 觀察外觀 )、香 ( 欣賞香氣 ) 、味 ( 品嚐味道 )。
• 觀色：在白色背景下 ( 在酒杯後墊一張白紙或紙巾 )，將酒杯微微傾斜約45度，垂直望酒杯看顏色，看有冇變壞。不過，酒色跟酒質冇直接關係，反而跟葡萄品種、釀造方法、陳年時間有更大關係。
• 品評香氣：切勿立刻喝下去，應先聞吓杯內的酒，欣賞水果、花香、香料及木桶等香氣。
• 品嚐味道：唔好豪邁地一口飲晒，而係用整個口腔感受酒香。初學者要留意酒的結構，包括甜度、酸度、單寧、酒精度及餘韻。
品嚐酒的味道時，緊記是呷一小口，不要一飲而盡。
3. 在餐廳如何Order酒？點解波爾多酒最穩陣？
波爾多葡萄學院的認可導師Stephen Mack有多年教學經驗，建議職場新手應該保持輕鬆心態：「飲酒要Relax同Enjoy，唔係令人緊張。」Stephen教路，在餐廳或酒吧，Order法國波爾多酒最穩陣。因爲：
• 波爾多酒勝在有典型的風格，容易上手。而且波爾多有齊紅酒、白酒及甜酒，好多餐廳嘅Wine list都有供應。
• 紅酒有分酒區，如左岸Medoc，右岸Saint-Émilion。白酒來自兩大區，Entre-deux-Mers及Graves。
• 未學識品酒，就唔好叫太貴嘅酒。年份方面，推介波爾多2015及2009年份的酒，2015年不少入門酒都好抵飲。
波爾多葡萄學院的認可導師 ( 右起 ) Jennie Mack及Stephen Mack分享，在餐廳或酒吧，點法國波爾多酒最穩陣。
4. 緊記7大葡萄品種
葡萄品種影響酒嘅風格，係Wine menu到常見嘅品種有：白酒Chardonnay ( 風格多變，可由清爽至濃厚 )、Sauvignon Blanc ( 芳香奔放 )、Riesling ( 女土至愛，德國的常帶甜度 )。紅酒有Cabernet Sauvignon、Merlot ( 出自波爾多，濃厚黑果風 )、Pinot Noir ( 出自勃艮第，優雅紅果花香 )、Shiraz ( 澳洲最出名 )。
5. 乜嘢係葡萄酒「新、舊世界」?
舊世界為歐洲地區，有較長嘅釀酒歷史，如法國、意大利、西班牙、德國等。新世界為較新釀酒嘅酒區，發展新技術。如澳洲、紐西蘭、智利、阿根廷、美國等，亞洲代表有日本同中國。
6. 點樣斟酒？
如果要斟酒，千祈唔好斟滿成個酒杯。應斟至酒肚約四份之一滿的位置，而香檳杯則約三份之二，留有空間來聞香。老闆聞唔到香，浪費咗支靚酒，真係唔知會有乜嘢後果。
不同葡萄酒需需要不同的溫度去品嘗。
7. 所有酒都要雪凍嗎？
不同葡萄酒需要不同的溫度。太凍令白酒變淡。太熱令紅酒難以入口。氣泡酒要雪凍，最佳溫度為6至8℃。白酒分兩類，分別係「輕至中酒體」及「中至高酒體，經木桶陳年」。前者較輕身清爽，適合7至10℃品飲，如Sauvignon Blanc、Chablis及Pinot Grigio。
至於經木桶陳年的白酒，適合較高溫度10至13℃。紅酒也分兩類:「輕至中酒體」需要微冷飲用，以13℃為佳，例如Beaujolais及Valpolicella紅酒。較重身的紅酒宜室溫品飲，例如法國波爾多、意大利Barolo、澳洲Shiraz。注意所謂的室溫係15至18度℃。
8. Happy hour飲咩Cocktail?
一班同事去飲野，最忌猶豫不決，唔知叫咩飲。Margarita、Manhattan、Mojito都是不錯的選擇，它們分別以Tequila、Whiksy及White rum為基酒。要小心較高酒精嘅Cocktail如Long Island Iced Tea。
9. 食物配酒基本法
白酒配白肉，紅酒配紅肉。Stephen說：「Don’t be afraid to experiment!」佢介紹創新食法，以波爾多 Sauternes 甜酒配生蠔，甜酒的濃甜，配生蠔的海水鹹香。波爾多葡萄學院 ( Bordeaux Wine School ) 成立30周年，教授波爾多葡萄知識，想學餐酒配對嘅你可去網站取經。
威士忌可謂近年大熱，成為商務飯局的熱門話題。
10. 威士忌要識啲咩?
潮流飲日本威 ( 山琦、余市、白州、竹鶴 )，呢幾年炒到好貴，特別係羽生、輕井澤。傳統酒區有蘇格蘭威士忌，主要分Blended Whisky ( 如Chivas、Johnny Walker ) 及Single Malt Whisky ( 如Macallan、Highland Park )、美國Whiskey ( 如Jack Daniel、Jim Beam )。另外，威士忌可以加冰飲 ( On the rocks ) 或者唔加冰 ( Neat )；亦可以加幾滴水，釋放香氣。
文：Crystal Chan
