「唔係！你唔咁做係唔得㗎！」

「點解一定要咁做？」

「我地做開係咁做囉！」

唔知你有冇經歷過呢啲對話？特別如果你喺一間有啲歷史嘅公司入面做過，以下呢種故事你可能成日見。

拿鐵芝係一位經驗豐富嘅老臣子，據傳聞中估計，佢喺公司嘅年資有廿年以上。一個有廿年以上經驗嘅員工對公司嘅運作暸如指掌，一直都係同事查詢公司大小事務嘅對象。而且因為拿鐵芝係老臣子，連老細都會忌佢三分。

有一日有位新同事入職，佢叫小火子，小火子已經有一定工作經驗，對新工作頗有熱誠，希望可以喺呢間公司有番作為。不過，佢唔知道身邊有一個重大嘅障礙物，就係老臣子拿鐵芝。

有一次小火子發現啲文件嘅地址寫法好古怪，每一份寄去荃灣嘅文件個地址會寫做九龍區，雖說郵差叔叔應該都睇得明，但荃灣明明係新界，點解次次都寫做九龍？於是佢走去問最資深嘅拿鐵芝。

「點解荃灣會寫九龍嘅？」

「荃灣係九龍區嘛。」

「呀 ⋯⋯ 其實荃灣係新界區嚟。」

「唔係呀，係九龍。」

小火子以為呢啲係常識，但原來唔係。

「其實你上Google查下就知，荃灣真係新界嚟。」

「因為我地公司不嬲都當荃灣係九龍，所以我地寄信都只會寫九龍。」

嗚哇！呢個到底係咩邏輯？如果你公司話旺角喺新界，咁旺角係咪會去咗新界呀？

無論小火子點解釋，拿鐵芝都要堅持荃灣喺九龍，堅持話做咗咁多年都係咁做所以唔會改。

又有一次小火子發現部門有一個程序好繁複，一份文件同另一個部門來回三次先可以完成，小火子認為可以簡化到一次，大家都慳唔少工夫。但無論佢點同拿鐵芝解釋，拿鐵芝都話：

「做開係咁做，所以一定要咁做。」

之後有好多次小火子嘗試作出一啲改動但都被同一個原因拒絕，最後乜都做唔到。最慘因為拿鐵芝係老臣子，老細都唔會強逼佢改變。做咗幾個月之後，佢嘔到成地都係血，咩火都熄曬，漸漸有離開嘅念頭。

「做開咁做，所以要咁做」，從來唔應該係一個拒絕改變嘅理由，但係唔知點解喺好多辦公室入面都好理所當然。其實明知啲嘢係錯，或者有更好嘅方法，因為「不嬲咁做」而一口拒絕，對事情一啲幫助都冇。如果係有其他原因，咁不如一齊坐底諗下有冇更好嘅方法，好過故步自封，食古不化啦。

以上文章刊於《招職》。

Career Advice Career counselling, advice and guidance Select article category Select article category Productivity TipsWorkplace EnglishIndustry StoriesJob Search in Hong KongHR Career SuccessHow to Get PromotedCareer Path PlanningCareer Coaching & GuidanceAdvice Columnist

Career Advice Career counselling, advice and guidance
Select article category

Select article category

Productivity Tips
Workplace English
Industry Stories
Job Search in Hong Kong
HR Career Success
How to Get Promoted
Career Path Planning
Career Coaching & Guidance
Advice Columnist