入行有乜要求？
兼職侍應生要求中三程度，要識講下普通話同英文。全職侍應就要求中五學歷，無需經驗。必需鍾意同人溝通，有圑隊精神，要有EQ ( 面對麻煩客 )。如果之前有兩至三年其他餐飲侍應嘅經驗，可以直接入職做主任。

返工有咩做？
兼職同全職侍應生主要就係樓面招呼顧客、Set枱、收拾同打掃。而主任即係Senior，除咗基本工作，仲要帶下新人同協助監督衛生。而分店副經理就開始要分擔經理嘅管理工作，睇住啲細嘅，幫手培訓員工，開始參與控制食物成本同盤點食材。分店經理就要管理下屬，例如編更表，最重要係睇住分店營業額、控制成本。

咁多間連鎖壽司店，有咩分別？
香港連鎖壽司店主要有幾間，包括板長、元気寿司、千両同爭鮮，咁多家連鎖壽司舖加埋都過百間。工作地點方面，連鎖店Job Ad會寫明工作分店區域。無論邊間連鎖店工作，有時都會因為某些分店唔夠人手，要調去其他店頂更一、兩日。

至於工作範圍，有啲只需理樓面，但某啲就一腳踢，樓面廚房兩邊走。例如本身做廚師，但係你靚仔靚女，就有可能被人調出去幫手做樓面。相反如果廚房唔夠人，都有可能叫侍應走入去幫手做下簡單嘅壽司，或者做熟食。見工時最好問清楚啦。

人工及福利是否吸引？
兼職侍應生：每小時50至80元
全職侍應生：每月13,000至15,500元
接待員：每月13,000至17,000元
主任：每月16,000至19,000元

上述四間壽司店品牌，當中有兩間雖然都屬同一餐飲集團，但其中一間的市場定位較高級，人工會高啲，例如主任人工可高達19,000元，相反定位較大眾化的，主任級人工約16,000至16,500元。

一般連鎖壽司店都有營業獎金。若果分店生意好，每月約有700至1,500元獎金，視乎大舖定細舖。如果港島區或東涌區返工，元X仲有交通津貼1,000元。最吸引嘅福利係有機會免費旅行。例如元X每年有「傑出團員」選舉，經提名同篩選，最後選出約20個勝出者，免費去日本交流。啱晒鍾意日本文化嘅朋友。

升職加薪點玩法？
連鎖壽司店都係大集團，有明確嘅晉升階梯同培訓計劃。晉升階梯由全職侍應、到侍應主任、再升分店副經理、最後分店經理，甚至分區經理。以千X為例，首先工作表現要好，受到上司賞識，就可以參加公司嘅晉升課程。跟住就上堂讀書，然後通過考試，就有得升職加薪啦。公司有埋考試假比你溫書。至於晉升速度，都好睇自己嘅表現，快嘅兩年由侍應升主任，都有啲人要三四年。

工時長不長？
做飲食行業工時就一定長㗎啦。雖然全職理論上每日返大約九個鐘，但計埋食飯時間同埋有時啲客遲走，其實實際時間更加長，例如返12:00放23:00，每周工作5至6日。另外有分早、晚更，輪班返工。

有冇得食公司嘅壽司？
日本高級餐廳員工，有魚生飯食；而連鎖舖就間間唔同，爭X就包膳食。而千X同元X就唔包，當日賣剩嘅壽司唔可以攞嚟食，不過有膳食津貼1,000元。咁做係為咗控制成本，杜絕有人專登整多啲壽司出嚟。留意返，兼職係按時間計錢，放飯時間自然就冇錢收。

乜嘢顧客最麻煩？
最麻煩就係食完晒又賴死唔走嘅客。喺繁忙時間，就會阻住其他客人，直接影響生意。而收工嘅時候，就會阻住員工收工。

跳槽易唔易？點樣留住啲人？
飲食行業向來都好難請人流失率高，所以跳槽向來好易。不過同其他工種一樣愈高職位，就愈難轉工。好似經理咁，每間分店只有一位，職位少自然難啲轉。而要留住下屬，其中一個要訣係搞好樓面同廚房嘅關係，令到同事關係好，做得開心自然可以留住人才。

連鎖壽司店會請DSE畢業生嗎？
連鎖壽司店請全職侍應要求中五學歷，DSE畢業生學歷一般都過關。更重要係面試表現，因為經
理會在乎你臨場對答，測試你可否同客人溝通。餐飲業講求同客人相處，適合性格外向、鍾意同
人吹水及善於表達自己嘅年輕人。搵工最重要係啱自己性格。

年輕人值得投身飲食業嗎？
在壽司店儲左兩、三年經驗，可以跳去其他餐廳或酒店繼續發展。有啲朋友侍應出身，靠自己努力，
升上去做酒店高級中餐廳經理，帶領十幾人嘅團隊。如果你係今屆DSE畢業生，又想試吓喺餐飲
業發展，不妨試吓面試先。真係條條大路通羅馬。

文：Crystal Chan
部分圖：SCMP

Career Advice Career counselling, advice and guidance Select article category Select article category Productivity TipsWorkplace EnglishIndustry StoriesJob Search in Hong KongHR Career SuccessHow to Get PromotedCareer Path PlanningCareer Coaching & GuidanceAdvice Columnist

Select article category

Search Article

Tag: 樓面

【行業內情】 連鎖壽司店侍應人工幾多？請唔請畢業生？係咪有機會去日本受訓？

Career Advice Career counselling, advice and guidance
Select article category

Select article category

Productivity Tips
Workplace English
Industry Stories
Job Search in Hong Kong
HR Career Success
How to Get Promoted
Career Path Planning
Career Coaching & Guidance
Advice Columnist

【行業內情】連鎖壽司店侍應人工幾多？請唔請畢業生？係咪有機會去日本受訓？