上司同下屬之間永遠有一種互相辣㷫嘅傾向，但往往被辣㷫完又反擊無力嘅，通常都係處於食物鏈底層嘅下屬。經常被辣㷫嘅下屬，好易影響心理健康甚至身體健康。如果你老細經常辣㷫你，命都唔知短幾多年，或者，係時候要諗諗係咪要離開佢。

1. 最鍾意放工先搵你

喺仲可以夜晚堂食嘅星期五Happy Friday，我約咗朋友小恩子放工食飯，小恩子平時好少遲到，佢通常都係早到攞埋位，坐喺度等你嗰種人。嗰次我約咗佢7點半，但到7點半先收到佢WhatsApp短訊話要遲到，到8點都未到佢。等到8點幾佢終於出現，見佢面色紅潤、眼神充滿火焰、一坐底就嘆口大氣，估計佢應該受完氣。於是我問佢邊個激嬲你，佢就話：「我老細囉，臨放工先佢先捉我入房叫我做嘢，又話好快，但一講就講咗成粒鐘。」雖然老細叫下屬做嘢係天經地義，不過都要「識做」先得。放工先叫人做嘢，特別係Happy Friday，絕對係極速辣㷫下屬嘅絕招之一。

2. 所有嘢都好簡單

唔知點解，喺老細眼中，世事都變得十分簡單。唔知你有冇聽過老細講呢啲說話：

「呢啲嘢好易啫！」

「做呢啲好快嘅啫。」

「得唔得閒？幫我做樣嘢，好簡單㗎。」

呢啲唔知係咪就係老細同下屬嘅差距，老細認為一秒完成嘅事情，下屬可能要花一粒鐘。定係老細你自己冇親身做過，所以唔知民間疾苦?

3. 階級就是一切

「而家我高級過你呀！」

講得出呢句說話係一種傲慢嘅表現。「我係高你一等，所以你要聽我嘅指令」，通常要用到呢一招，一係佢天性傲慢，一係佢真係㷫到要用最快捷嘅方法解決件事。呢種方法或者會收到即時效果，但往往都暗暗辣㷫下屬，其實會唔會有其他更好嘅方法？

4. 無一刻會放過你

喺香港，好多打工仔都唔知咩叫收工，皆因收工都係要繼續辦工（有WFH之後仲慘烈）。記得有次同個大忙人朋友食飯，約咗佢N次先約到佢出嚟，結果佢一坐低電話就響，傾完電話坐低唔夠兩分鐘WhatsApp又響，秒秒鐘幾廿萬上落咁款。結果成餐飯佢似返緊工多過食飯，後尾先知原來佢老細仲喺公司遙控緊佢做嘢，而且每晚、甚至放假都係咁。大佬呀，你唔收工你啲下屬都要生活，呢種老細除咗辣㷫下屬仲會辣㷫埋佢身邊嘅家人同朋友。如果你身邊都有咁樣嘅朋友，請你建議佢諗清楚自己係咪要過呢種生活，以免後悔莫及。