過完年，使完錢，望一望張糧單，公司好似冇乜加過你人工，就算加咗都可能得幾百蚊，樓下茶餐廳加一加價都冇咗。跟住又再諗一諗，平時收工成日都要OT到搭的士，好耐冇食過住家飯，諗起下年都係咁，命都可隨時短幾年。諗到呢度，「轉工」兩個字應該已經出現喺你腦海裡面，加上過年後湧現大量引人轉工嘅招聘廣告，更加令人轉工意欲旺盛。

好多公司嘅HR都會喺過年後開始正式踏入「旺季」，人地生意興隆就一定係好事，但HR生意興隆就真係大吉利事，因為好多時都同辭職信嘅數量有關。過年後，公司好多時都會出現呢幾種嗌辭職嘅朋友。

1. 裸辭型

佢地通常係第一批辭職嘅同事，因為本身未搵工嘅關係，花紅成為咗其後搵工時嘅生活費。 計過度過，慳慳地應該都生活到一段時間，而且利用呢段時間去搵工，可以唔駛請假去見工，仲可以即時上班，大大增加見工嘅籌碼。  佢地喺銀行轉帳之前，早已預備好辭職信袋喺身，等花紅袋袋平安就隨時同老細辭職，只要畀足通知期，就可以揮一揮衣袖不帶走一片雲彩。 

2. 忍咗好耐型

當佢嚟到HR做Exit interview，未入房已經會感覺到強勁嘅怨氣。相信對佢嚟講，應該等咗呢日好耐，等出花紅嘅日子一定係渡日如年。同佢地做Exit Interview，一般都要預比較長嘅時間，因為呢個Exit interview可能會變成一個宣洩大會，畀佢一吐心中嘅不快。「哼！忍咗咁耐，終於畀我等到呢一日！」宣洩過後，完全睇得出，辭職令佢身心舒暢、舒筋活絡，一身都鬆曬。

3. 預先搵工型

緊接第一批裸辭嘅朋友，大約一個月後就會陸續出現下一浪嘅辭職信。呢批同事一般都係接受唔到裸辭，但又有極強轉工意慾。早喺花紅過戶前已經發出多封求職信，務求喺短時間內搵到工，辭到職。辭職係早嚟幾個月前已下嘅決定，辭職決心極高，呢個宇宙都冇咩嘢可以阻止到佢。

4. 為錢出走型

每年嘅辭職信數量，某程度上都會同公司嘅加薪幅度同花紅多寡有一定嘅關係，因為多同事都會睇埋加幾多人工先決定辭唔辭職。如果嗰一年加薪幅度少、甚至凍薪、冇花紅出，離職率通常都一定會比較高，嚴重啲甚至出現逃亡潮。不過學馬雲話齋，員工離職只有兩個原因係真嘅，「一係錢，沒給到位；二係心，委屈了。」為錢出走都係人之常情，其實HR都一樣好明白。

5. 得個嗌字型

呢種類型係講緊每個office總有一個喺左近嘅同事。每年佢都話出完花紅就辭職，但每年都會見到佢繼續喺度做。次次都話辭職信都打埋，但從來冇印出嚟嘅打算。大家都係由得佢繼續嗌啦，下次佢再嗌，只需要應佢一聲「哦！睇下點⋯」