小熊每朝一聽到鬧鐘響，都會諗下今日返工有無咩大Tasks要做。無嘅話，可唔可以射波喺被窩懶下啊？反正一日Sick leave可以豁免交醫生紙。不過，喺張牀到典來典去幻想兩分鐘後，作為一粒小薯仔無權無勢始終怕死，過唔到心理關口，唔情願咁趕頭趕命出門口坐車返工去。未夠鐘開工個陣，通常大家都係木口木面喺位食早餐、聽歌和玩手機自閉一下，慢慢撻返著個腦。一坐埋位，見到枱頭放咗一份「高度機密」文件，想食埋手上個包先睇但不敵好奇心，拆開原來係一張大粒佬嘅病假紙啫，想放埋一邊時再望多眼；咦，放成兩個星期病假嘅？唔通有大件事入咗院？

怪唔得之咁緊張啦，原來係唔俾張揚嘅情緒病，真係可大可小，放幾耐假休養又無人知，而班細既突然群龍無首又係一個問題。想為咗唔打擊士氣要收得埋，不過病假Keep住長放嘅話，點都會唔覺意走漏風聲。「唔係嘛佢，Touch wood仲以為咩病，唉，我日日開會開O.T.，飯都無得返屋企食啊！有人會Appreciate呢啲付出嗎？」有第一個帶頭講起，其他人就忍唔住逐個爆！「佢失驚無神放假之前，已經成日拖我地啲野，有時提醒下佢睇我地寫嘅Paper，仲發脾氣嫌我地追佢，而家啲野唔知俾邊個簽好啦！手頭上仲有幾個大Project等佢落Final decision，抖唔緊要，搵個人幫手跟進得唔得？咁大個人唔洗我地教嘅下話。」無人問究竟個位高級經理病況去到咩程度，一聽到「情緒病」呢個字眼就已經好敏感，係香港做得打工仔嘅，有邊一個唔辛苦唔受氣？而家係街邊篤串魚蛋都要一眼關七啦！何況係人言可畏嘅Office工作？「大大話話放咗成個月，佢咁高級儲咗大把假有排搣，仲要唔洗扣糧！公平咩？衰啲講句都幾爽！」

上得咁高職位，俾人知道你承受唔到壓力只會明示你力有不逮。大家出同一份糧，好現實公事公辦，人人眼中可以自醫嘅情緒問題，係Suppose可以短時間內用自己方式重新Ready for work嘅。Under老闆做野嘅人一定經常性Mood到，特別係你想上位，更可能要違背本性去壓榨班細，代老闆去花時間參與唔同部門嘅應酬，唔夠人手時要做埋一堆吃力不討好嘅Paper work，為左迎合太上老君心意你唔敢Say no，呢啲怨憤積積埋埋就會形成一個殺傷力驚人嘅計時炸彈！

未爆嘅時候，日日埋位如坐針氈，專心唔到開會睇Report俾Comment，同事準備嘅Presentation稿記唔到入腦，結果任何目標都達唔到，事倍功半。到爆嘅一刻，你Mood到就瀟灑避世，周圍嘅人慘在陪你遭殃，夾手夾腳勉強做埋你個份！最多只交待個秘書自己係咪會繼續放假，Fax病假紙番黎，咁搞法你有幾大理由人地都好難接受。

真心講句︰「想安心穩袋十萬大元人工一個月，唔該唔好再胡思亂想，拿拿聲明天好返工啦，愈遲返你愈難面對！將啲壓力加諸係同事身上，到時個個Mood到唔想撈，你又負得起呢個責任嗎？」