好多公司經常打住「著重人才發展」嘅宣傳技倆去請人，係咪真係會由員工角度出發，好睇話事人心態係點。

我細細個嘅時候，爸爸喺香港一間大機構工作，以佢果個年代嘅人黎講，有英國大學嘅學歷係好吃香，做左30幾年仕途一直穩步上揚。可惜將近退休之時，公司搞合併，啲管理層都好坦白同我爸爸講：「好多謝你服務咗公司咁多年，不過你知啦，合併咗就唔係樣樣野都係我地話事。嗯……我地目前需要多啲人手做野，但係資金有限，所以好無奈地要你離開。」講白啲就係錢嘅問題，爸爸嘅人工一個抵五個新仔，公司就只有呢個考慮。無功都有勞，喺呢個重組嘅時候，淨係識將公司眼前利益擺喺第一位，就將所有有返咁上下年資嘅Senior一係逼走，一係炒，咁邊個去教新人？邊個可以將每個Project要注意嘅地方逐吋指出？邊個同你捱更抵夜睇實條Team拍住上去完成個每個Task？個個50出頭重新喺唔熟悉嘅市場搵工，就算搵到工都搵唔返呢個人工，而下面班細嘅睇到咁嘅情況驚到腳震震，士氣大挫。

喺我初出嚟社會做野時，爸爸提醒我，每份工盡量做長啲，因為佢好清楚除咗人工、職位、年假會隨年資上漲之外，所建立嘅人脈同埋工作經驗至係寶。爸爸就係好例子，雖然臨退休先嚟轉行，唔多唔少都擔心新工作要花多啲時間Take up，幸好以往經驗累積一套嘅管理之道大派用場。佢新老闆成日笑住講︰「有你喺度，我真係可以輕鬆放下假！啲公事你仲緊張過我嘅！」。爸爸第一次發現細公司嘅好處，充滿人情味和「被需要」嘅感覺，真係少咗你一個都唔得。

而我地呢一代已經好少會有「打死一份工」嘅諗法，選擇多咗，出路多咗，好多時做滿一、兩年，想轉工試下其他範疇嘅野，去搵自己事業嘅方向。就算明知多數HR睇CV時會覺得Jumpy，只要有老闆肯錄用，又有何不可呢？難道過多10年事業穩定落嚟先諗？到時就有太多顧慮，唔係咁易可以瀟灑地轉身就走。不過久唔久身邊總會聽到有一、兩個女性朋友心聲︰「其實只不過想搵一份可以Hea啲嘅工做一世啫，可以準時收工，人工同普通文職差唔多就得架啦，應該唔難啊。」呢句說話入面都蘊含咗唔少要求。又要無壓力，又要唔怕被人炒，又要人工唔好太低！如果真係有呢啲可有可無嘅位都唔好恨，搵任何人做都得啦，點解要揀你？仲要無風無浪比你Hea成世？出嚟做野無不勞而獲，向現實低頭啦！