首先你要有出色嘅執生、馴獸和營造氣氛能力，對人嘅工作可以話係日日都有你想像唔到嘅新挑戰，猶如公司內部嘅專業顧客服務員。

HR崗位可以分做In-house或者對外嘅，你問我做邊一樣會舒服啲，我只能冷笑一聲，周旋喺老闆、部門主管和客戶之間，兩樣都需要充足嘅耐力。香港HR嘅工作大致分為人才招聘、薪酬管理和員工培訓三大類，先講人才招聘方面，我地要好明確掌握到所負責招聘職位嘅市場動向，喺「筆直」限制下搵到一個渠道收集到最多最啱用嘅CV，軟硬兼施逼問清楚部門主管要請具備咩特質嘅員工，因為好多時佢地無咩意見，話隨便搵個識做野嘅人就可以，咁我點寫落Job requirement呢？要嘅係客觀、具體嘅Keywords！

人才招聘

唔單止喺網上登招聘廣告，根據各職位對邊一種媒體接觸度最高，會張貼廣告喺報章雜誌或者舉辦大小型嘅招聘日。自從有最低工資後，低技術嘅工種愈嚟愈難請人，唔想打價格戰，價高者得對市場長遠發展根本唔健康，所以喺招聘日見到合適嘅求職者時，HR就化身為Top sales，落足嘴頭，用最少時間比到佢想獲得嘅資訊，令佢知道我地公司嘅競爭力和優勢。

薪酬管理

小熊最唔擅長計算薪酬福利，一見到洶湧不絕嘅數字就開始頭痛。如果公司有大量唔同類型嘅員工，包括月薪、日薪、件薪和兼職嘅員工等，而根據佢地各自嘅入職時間，薪酬待遇會係大不同，一到月尾酷刑就嚟啦！由頭到尾仔細檢查一次每一位員工嚟緊出糧嘅數目係咪正確，費盡心神去核對每張人手寫嘅Timesheet或者拍卡機紀錄，唔好考究點解仲有大公司會咁落後，只需要做好心理準備有機會做同樣嘅工作。

唔只每個月，每年仲要大規模Review員工嘅薪酬福利架構，需要點樣微調去平衡返公司和同事利益。事前可能要邀請所有同事填問卷做一個全面嘅統計，加上參考同離職同事做Exit interview時要旁敲側擊知道係唔係因為薪酬嘅原因被跳槽挖角。不論公司選擇酌量按比例加薪，或者逼不得已要裁減人手，我地必須配合公司決策，演好公關角色，吹噓公司依然不比下去嘅競爭力，包裝得美侖美奐。

員工培訓

對於挽留人才，我地就要定時安排專業講座和培訓，Job rotation去激勵士氣，提供條件令大家更加為公司無悔去賣命，賣命得更到位。而公司難得大方花金錢和人力去搞Training，HR就要一力包辦老闆們嘅面子，又有一連串痛苦嘅工作開始！最擔心係咩呢？就係專登邀請高層紆尊降貴嚟做場比面Talk，但嚟觀摩嘅同事竟然寥寥可數，真係醜死怪啦，你話咁嘅場面到時仲繼唔繼續落去好？係咪佢本身嘅號召力唔夠？當然唔係啦，係我地宣傳不足，好多同事Reach唔到呢個活動資訊先至無出席，一定係咁架！

作為公司內部出眾嘅專業顧客服務員，係時候發揮強項啦！預先聯絡各位相熟秘書姐姐，幫忙散一散消息比佢地老闆，請佢地傾好當日搵邊班同事去撐場，我地計定每個部門至少有一定數量同事去，安排好晒座位就無有怕啦。預好咗人數，就要去規劃成個活動流程，不過淡定，通常有大把以往嘅Sample跟住做，大同小異架啫，老闆仲緊張過我地呢班小薯仔，佢地嘅意見滔滔不絕，想搞到好盛大好Grand，反而好考HR嘅馴獸技巧，要喺適當時機捉到老闆嘅喜好而預計埋自己嘅能力，一邊監察住佢地嘅微細表情有無任何不滿而提出最合適嘅方案。

一口氣分享咗幾個大主題，有無嚇怕咗你？抑或你信心爆晒棚覺得係「依絲執」呢？

以上文章刊於《招職》。