每逢新年，喺濃厚嘅氣氛下大家都興致勃勃，拜年見到姨媽姑姐被佢地問到嚟緊有咩工作大計，幾時拍拖結婚云云，自己可能都忍唔住講返幾句應酬下。同佢地講，又唔使負責任嘅。人愈大有時愈怕去諗自己將來嘅發展，經歷過好多變數，當中嘅失望令自己覺得不如見步行步，而一習慣咗見步行步就會覺得改變係一個好沉重嘅負擔。

即使你甘願作為一粒小薯，都要有大志。

學懂擦鞋技倆搏上位不過係旁門左道，你而家有嘅優勢就係職位低微唔怕輸，就算跌都唔會跌得好傷。做咗幾年好易會開始鬆懈，心思思想處於安逸之中。但你自己知架，仲有幾十年要做，唔多啲吸收每間公司獨特嘅好處，第時有咩事你會招架唔住的。

小薯都需要改變，首先係主動啲

每年年頭時雄心壯志話要變得點好點好，到年尾結算時又完成到幾多成呢？結果又將自己想做嘅推去下一年再算。Office裡充斥住小薯，呢個年代多咗人志不在正職，或者咁講，份正職根本唔能夠令你安心去全情投入，公司一句Budget唔夠就唔續你約，又要重頭適應一份新工作。打工仔嘅特性就係咁，實際成果係公司擁有，而你就要諗點樣喺收緊人工時Benefit自己。好多性格較內斂嘅朋友仔﹙包括我﹚都有要同老闆同事交際嘅苦惱，唔識引起話題又怕講錯野被人笑，變咗好多時只係陪笑附和下。唔想存在感愈來愈低嘅話，首先要主動「露面」，咪下下返到Office就迅速將自己收埋喺位度，然後低頭食麵包，低頭處理文件，低頭發呆等收工。

從工作細節開始入手

先向身邊人埋手練習，如果你慣咗E貓同放低文件喺阿頭個Tray就閃人嘅話，要開始講多兩句啦，例如發現手頭上嘅Case同平時做開嘅唔同，做好咗放低時可以稍作溫馨提示阿頭，你已經搵咗類近嘅Sample夾喺後面比佢參考，又或者用Label flag起咗啲需要特別留意嘅地方方便佢知。講公事應該尷尬有限，而且阿頭一定Appreciate你呢啲「小動作」，帶起佢對你嘅主動，隔閡少咗，慢慢你會揣摩到對你阿頭幾時做啲咩可以得到最佳效果。建立咗信心，自然你就唔會甘於一個成功例子，會識得去行前多幾步，睇闊啲呢個令人煩厭嘅職場。

要改變之前先要了解自己能力去到邊，量力而為。唔係一嚟就逼自己目標要Hold得掂一個Function，或者要舉手上台做MC，你話得我都勸你唔好啦。太高估自己，一下子走得太前，多數追到半路就會質疑係咪應該繼續落去，平衡唔到心理只會前功盡廢。

新一年，願望就是要認真改變。今次講真的。