一年一次嘅Appraisal對打工仔黎講係一個爭取權益嘅機會，定係俾阿頭名義上討論工作表現，實際上用黎繼續壓榨你辛勞嘅續約條件？

上一代嘅人成日話出黎打工為咗份糧點都要忍，不計其數嘅死貓，有功上司領，幫手做私人野，總之有柯打就一一通殺。做Apprasial嘅時候，俾個「中規中矩」嘅Grading，做員工嘅幾想咬牙切齒大叫「有無搞錯啊？做到得返半條人命，日日唔夠訓，Anytime standby，你好意思出手咁低？豈有此理！」最後為咗份工都係要將啖氣吞返落去。以前，的確無咁多選擇，一有咩行差踏錯，Bad record好易跟一世。所以佢地經常苦口婆心一句「寧得罪君子，莫得罪小人」，只要肯捱肯搏，一上到位到時可以牙斬斬嘅咪係你囉！呢個惡性循環，其實太唔健康，Apprasial唔應該係公司單方面嘅把戲。

到咗而家，老闆眼中嘅打工仔大膽咗好多，會敢頂嘴，會蠢蠢欲動想去表示不滿。所以一有Junior post出招聘廣告，老闆都明示想請啲聽聽話話嘅白紙，我講咩佢做咩，就最好。係私人公司嘅話，老闆覺得俾人工仲要徒添煩惱，不如簡簡單單換個人算數，佢睇唔順眼要寫衰一個人嘅Apprasial然後炒咗佢係唔難。不過喺公營機構，就要做足程序先至拎到Approval炒得，而Apprasial係其中一樣重要「證據」。首先要Consult一下個同事，循例俾機會佢講下工作表現上嘅困難，作為上司有無方法可以幫佢改善，而同事又願唔願意行多步去達到上司心目中嘅Standard呢。如果傾店數嘅，就可能做返個Review，將大家嘅期望寫低簽個名作實，放長雙眼睇下喺定咗嘅期限做到有幾多！通常喺呢種情況下，是但一方會軟化落黎，Review記錄亦唔會喺Apprasial入面，免得同事有太大Hard feeling繼續留喺度。特別係大機構今時今日鍾意講Image講包裝講People-oriented，為面子唔會搞到情況一面倒，怕招人話柄，所以會喺Apprasial盡量寫得客氣啲，而且「有商有量」，先會做到最理想嘅雙贏嘛！係好虛偽但係正正每日都發生緊。

若然有一方極度不滿，傾唔店數，都唔可以一嚟就炒咗人，可能要立即請位大粒啲嘅Hold一個Meeting，白紙黑字寫低雙方Comment，要小心啦……唔少上司暴走起嚟唔小心好易中歧視，例如話個同事生完BB之後唔聽指令工作頻頻出錯，就中咗家庭崗位歧視，又或者提及同事放完長病假返嚟做野慢條斯理Meet唔到Deadline，咁樣講又踩中陷阱，所以幾嬲都好，因住禍從口出。

對同事嚟講，即使上司俾低分，Apprasial仍然俾機會你「上訴」，唔少大公司嘅Apprasial form新增左個Column 俾你表明點解唔同意對方講嘅野，辯護內容係會記錄在案，起碼唔會完全No say嘅。假設將來調咗去第二個部門做，人地睇到你個P file，見到咁低分個心一沉，但你嘅意見可能會令佢有所體諒，花啲時間注意你係咪人地口中講到咁差。如果一段時間後觀察到你根本唔係咁，低分形象自然會被消除。

Appraisal係直接影響同事嘅前途，做上司嘅唔好意氣用事，鬆手啲同事實會好感激，分分鐘佢唔好意思加返多兩錢肉緊做野。除非太差勁，做完Review依然做野求其，Hea無責任感做錯周圍賴，咁就要好好懲罰下，出封Warning letter，都無改善，咁就注定大家工作上無緣份啦，係咁先。

以上文章刊於《招職》。