一些初為人父母的家長都會話，屋企有咗個BB之後就無好好瞓過一覺。除了初生嬰兒餵養比較頻，需要少食多餐之外，BB換片、扭人抱、不適應環境等都會引致初生嬰兒入夜之後就哭鬧，或者深夜喊醒，搞到爸爸媽媽都有對「熊貓眼」。

在中醫的角度看來，初兒嬰兒夜睡不寧，定時啼哭、或入夜則哭、甚至徹夜哭鬧不眠，總稱為夜啼。夜啼在兒科的古籍中，有不同的鑑別，例如如果小朋友一熄燈就喊，一開燈就唔喊，古代的醫家認為只係因為小朋友一時不習慣，只要二、三晚左右，由得他喊，之後他就會知道熄燈其實是正常的，家長千萬不可以為了令孩子不哭而長明燈火，影響孩子的睡眠質素。

所以，要先排除一些令孩子起居飲食不舒適的因素，好似古書《育嬰家秘》所說「渴則飲之，飢則哺之，痛則摩之，癢則抓之，其哭止之，中其心也」，但如果做了以上後BB還在哭，就必需考慮是否有夜啼的病理狀況。

中醫認為夜啼有三大原因：

1. 脾寒：因媽媽素體虛寒或多食生冷，護理不當亦有可能凍親肚仔，因脾又屬至陰，會引致入夜之後出現肚痛的情況，要注意保暖調護，可以幫BB摩腹部舒緩哭鬧。

2. 心熱：媽媽素體若有熱或多食煎炸，餵哺的母乳亦偏熱氣，多見BB啼哭時面紅唇紅，比較煩燥，則屬心熱。

3. 驚恐：如果小朋友聽了過大聲量或異常聲響，或突發見到異常事情，會容易受驚，應為其安神定志，服食珍珠末是不錯的選擇，如果加上熱氣的症狀，可選保嬰丹，但要注意脾寒及G6PD﹙蠶豆症﹚的小朋友忌用。

圖：Shutterstock

以上文章刊於《招職》。