最近有則新聞，上海有女員工在公司年會抽中「有薪年假一年」，開心到似中六合彩。睇真啲，原來大獎寫住：「有效期至2018年12月31日」，而她中獎日期是12月28日，換言之根本只得三天有薪年假。

夠搵笨未？其實碎料。怎麼說，她終歸是「中獎」，話晒有三日假，起碼無「蝕」，最多空歡喜一場啫。總好過老闆應承你這樣答應你那樣，點到你陀陀擰，結果一句唔該就將你的辛勞吞噬，答應過的事當然來無影去無蹤。

公司N年前要在內地插旗，雖然不至於開發大西北咁荒蕪，但也是二、三線城市，吸引力低，總之不是「筍位」。呢種模式例牌要搵個香港員工上去坐陣開荒，而老闆睇中隔籬部門Patrick。

Patrick當時係部門新貴，眼看頂頭上司仲有幾年退休，佢就心紅想上位。老闆同佢講，只要佢願意去內地開荒，三年內必定調回香港，然後正式升為部門主管，坐正！

聽起來幾美好，Patrick年輕又沒有太大家庭負累，由佢去馬正好。唯一考慮是，他當時有個女朋友，感情本來幾好，一講到要分隔兩地，兩人為此事吵了不知幾多次。由於Patrick堅持事業為重，結果散咗。

三年後，Patrick雖然工作頗為稱職，但始終不慣大陸生活，又牽掛家人，就問老闆調回香港的安排。

結局大家估到啦，老闆當然想佢「三年又三年，三年又三年」咁繼續留喺上面，至於部門主管個位，早就空降別人擔任了。最戲劇性嘅係，他的前女友，湊巧就和這新主管拍拖，兩人快將談婚論嫁添。呢舖真係典型的「賠了情人又折兵」。

怪就怪佢信足老闆承諾，三十幾歲人都咁天真嬌啦。