能力愈大，責任愈大，唔止係超級英雄蜘蛛俠的台詞，亦係每一間公司的潛規則。聽起來，能者多勞，好合理丫，可是能力愈大，不等於可擁有相應的地位和報酬。好多公司甚至出現反比現象：能力愈大，孭飛愈大，地位愈低。至於班高層，當然係講就天下無敵，指手劃腳兼阻住地球轉啦，使乜講。

嗱，有些人會話，高層係負責決策嘛，唔通落手落腳揼石仔咩。算你講得通 ( 雖然好多高層根本腦閉塞，相信大家見唔少 )，可是，同職級同階層裏，一樣出現「做得嘢嘅做到死，廢柴嗰班Hea到死」的超級不平等狀況。無他，嗰班廢物，無嘢叻，偏偏最叻「無恥十訣」：

推、側、閃、避、卸；痴、儍、戇、喪、呆。

前五訣，係用來推Job卸責嘅；後五訣，係用來裝儍扮懵嘅，出了事，就靠佢來置身事外。詳細的應用方法，辦公毒男自己也是門外漢，實在教你唔到。要知道點先為之用得出神入化，望望社會上大型基建工程被揭偷工減料後，負責監管的高層如何關仁隱事，就知道呢十訣幾咁有料到。

扯遠咗少少。回看你我的公司，你發唔發現有些同事，每每能夠避開麻煩客唔使跟、惡啃Project永遠唔上身？佢就朝九晚五，你就朝七晚十一？明明佢同你同級？不要去羨慕，不要去妒忌，做人正面啲，趕快修煉無恥十訣吧！快樂的職場人生等緊你！

以上文章刊於《招職》。