好多人都覺得，腦細一時一樣，陰晴不定，返工做嘢最難搞的唔係實際工作，而係「湊老闆」。辦公毒男唔否認，我也覺得辦公室生涯最勞心勞力就是應付喪心病狂無定向的上司和腦細，否則就不會借此地盤呻這呻那呻到樹葉都落埋，偏偏網友表示勁有共鳴。這證明：正常和Make sense的腦細，確是如熊貓一樣屬瀕危動物，數量越來越少。

不過，潮流興正能量，我都認同齋呻不是辦法，Boss點難應付都得應付，就好似打機咁，一關一關打上去，總有打爆機的一日。無錯，由今日開始，辦公毒男決定把公司的Boss當作Game的Boss來攻略！

古語有云：跟官要知官姓乜。呢句話可以說是職場遊戲的第一原則：打工仔，首先要了解你的腦細，他的性格、他的習慣、他的喜好！

打慣機的人就知道，每隻Boss都有他的行動模式，就算表面上佢極度難以捉摸，「比你估到仲係食神？」，骨子裏還是有跡可尋的。《笑傲江湖》話齋：「只要有招式，就會有破綻。」所以，打工仔千祈唔好怯，你估佢識獨孤九劍咩？

拍拖，要帶眼識人；返工，要帶眼做人。學識觀察，係職場攻略的第一步。正所謂別人笑我太瘋癲，我笑他人看不穿，如果你搞來搞去仍是「看不穿」，我有一個實用的小建議：每當腦細大「發爛渣」、拍枱鬧人、Call人入房照肺，你就用紙筆 ( 手機仲方便 ) 記低事情背景、人物、主角衰乜等等。身為Office小薯，你未必知得很清楚，唔緊要，知幾多記幾多，久而久之，你自然Get到腦細的紅線 ( 禁忌 ) 所在。錯乜都係假，腦細的大忌千祈唔好碰！

避開Boss的「超必」( 即「超級必殺技」是也 )，保住條命先，否則Game over就講乜都無謂啦。