以前喺大機構工作，可以一份工做到退休係巴閉嘅，你有咁嘅能耐過度數十個年頭所有唔順心嘅問題，老闆亦對你嘅工作表現有一定程度嘅欣賞。然而到咗今時今日嘅香港，成日都話啲後生仔Jumpy，其實係佢地多咗選擇，變相會喺自己角度出發更多，食回頭草係等閒事，特別係大機構裡面見怪不怪，已經唔會再係一件覺得羞恥嘅事。

喺公營機構入面，稱呼為經理嘅大有人在，喺經理之中再分幾級。早排有位細經理回歸去自己做開嘅部門，佢以前由Intern做起，屬於實幹型，畢業後個個都想留佢就順利成章將佢轉全職，比咗一個大家都明知嘅難頂位佢捱下。對於呢類型嘅人嚟講，佢會寄望有人Appreciate佢嘅付出，唔介意蝕底啲長期加班，花時間熟讀晒所有相關嘅Policy，但經理們知道有呢種性格嘅人就當然盡情壓榨啦！真係少啲意志都會精神崩潰，心力交瘁。捱過咗幾年，又有經理點頭，可以晉一級！

點知，今次先進入真正嘅地獄。做中層嘅，得唔到上司嘅支持，又無幫得手嘅下屬，等同一人要擔當晒所有角色。以往，佢都可以憑著自己勤力肯學勉強地解決到大部分問題，而家一個Case pass比佢跟，無人講解成個Procedure，如果係自己做細嘅，有咩錯漏硬食都唔緊要啦。問題係細嘅旨意佢有晒Standard話佢地知要點做，就算佢參考舊時嘅Sample同Policy，由頭Set up返成個工作System出嚟，都需要大量時間。呢個境況重覆又重覆咁發生，所有事都係Unexpected咁持續發生，唔錯嘅人工同福利Package一直拖住後腳令佢唔捨得辭職。過咗兩年，突然間佢對自己失去信心，毅然決定要離開，比自己好好喘息一下。

之後就去咗私人公司做返相關嘅工作平穩咁過，雖然比以前過得舒服，但畢竟又過咗三年，隱隱約約浮現出想升職嘅心態。舊公司部門嘅高級經理主動聯絡佢，就話而家有一個升職位嘅空缺，覺得佢好合適叫佢申請。佢掙扎咗好耐，Package唔使明言就係好好架啦，只係佢心水清要去重拾類似以前嘅惡頂位，受唔受得住？

再一次，回到從前嘅戰場。

食回頭草，多多少少有心理關口要過。想唔到回歸嘅第一日，一班舊同事非常歡迎佢呢位救星返嚟！大部分同事其實好明白點解當初佢選擇走，佢地又何嘗唔想呢？就係無勇氣。所以有實力嘅，只要唔喺工作上做到一榻糊塗而被踢走嘅話，返嚟做，Why not？而且仲係返嚟升職，理由冠冕堂皇！今次佢有備而回，最緊要係精神上放得開，公營機構有佢自己嘅玩法，一個人默默做只會沉淪喺痛苦之中。佢Take up得呢個位置，就唔應該所有Task攬晒上身處理，而係要做好管理同分配資源。佢開始慢慢適應，提住自己要忍耐，唔好再一頭牛盲目衝衝衝，對下屬開多啲綠燈比機會佢地獨立處事，偷多啲時間比自己學懂去做決定，得人心比起完美地完成工作，係更好嘅籌碼。做事手法都要培養，習慣後自然更得心應手，睇嚟佢又可以Set定下一個目標！

圖：Shutterstock

以上文章刊於《招職》。