小熊就嚟爆喇！每次同阿姐講親請假嘅問題都係唔愉快收場，何解？

「小熊，你咪啱啱簽咗份新約嘅，咁新約開始前你要放晒舊個份約啲假先架。話時話，點解你明明一年得個十幾日假，可以儲到成廿幾日未放嘅呢？你兩年無放過假咩？」同事表示一臉驚訝，我呢啲小薯仔竟然要學人「清假」。

諗諗下又係，對上嗰次連續放咗五日假爽歪歪去旅行已經係兩年幾前嘅事，之後一直做做做，但彷彿老闆無Appreciate過，仲認為我OT得唔夠話我個人咩唔夠Flexible咁樣樣。人係貪心嘅，見你咁乖自動自覺留低，咪一直Push你Push到你出聲投降為止。

我阿姐近年自己新開咗條Policy，就係嚴禁我地同Team之間互相重疊放假日子，一日都唔准！唔批！皆因有次佢自己同我地Teammate撞咗連續四日假，仲要咁啱都係去外國出席朋友婚禮。照道理我同事比佢早申請假仲已經獲批，係咪以為好完美無位被人入呢？Office邊有呢支歌仔唱，呢啲Moment梗係拎個職級出嚟大石壓死蟹啦！好在我Teammate在位廿年，講年資同我阿姐不相伯仲，佢先唔怕呢啲所謂嘅強權，企硬唔取消假架啦，而且所有因素都有利佢，我阿姐唔能夠硬撼。最後阿姐為面子當然咩都唔理照申請啦，但怕死要報定案俾阿姐個阿姐知，人地一定好奇問點解重疊咁多日，佢竟然話有「勸喻」過我Teammate取消但唔聽，焗住一齊放囉唯有。

拿，Office係無秘密嘅，有一日我食完Lunch返埋位，見到我個平時係傻大姐嘅Teammate伏咗喺枱度古古怪怪咁，就行埋啲再行埋啲裝下佢做咩，原來好委屈咁喊緊。「發生咗咩事啊？係咪有人恰你？」坐喺旁邊嘅同事都好擔心，圍埋過嚟。「頭先大姐大行過嚟問我，又會咁啱同阿姐一齊放，我咪同佢講返晒成件事，仲開埋個System佢睇我幾早之前已經申請同埋獲批。我阿姐背後插咗我幾箭，講到係我專登同佢爭咁樣，放幾日假係咪要搞到咁啊？我跟足程序做錯乜啊？」一講又忍唔住眼濕濕，件事阿姐諗住搵個藉口當Settle就算，其實不過係佢自己要放就放，我地一干閒雜人等阻路就加條罪比你，有無咁Cheap呢？

今次就到我啦，由於有位Teammate即將放個幾月大假，而我啱啱受邀做姊妹想請一日假，咁當然拿拿聲Apply啦。過咗幾日見阿姐無動靜，就主動問下佢，佢先至話：「係啊，我見到你Apply咗，但阿邊個個段時間會放假，你有無咩特別原因要放？」唉，放一日都要解釋。好啦，今次講埋佢知。點知佢聽完後就話「係咩？唔得！咪講咗大家啲假唔可以重疊囉！你咁樣我會被經理鬧架！你自己Cancel返佢啦！或者等阿邊個返嚟你先放。」意思係婚禮完咗我先去請假？要如果一開頭堅持因為咁而唔比我放，根本唔使問我原因架！

做姊妹都係一世人一次，唔可以通融一下？而且放假嗰位同事係Handover手頭上啲野比我阿姐，所以就算我放一日應該對工作上無大影響。火上心頭之下去請示經理，經理強調只係唔Encourage成Team得返一個人工作，而非硬性規定有事無事都唔可以重疊假期。最後雖然獲批了，但係因為放一日假而搞到咁唔高興，覺得好無謂。查實我係咪應該話去見工會比較好呢？

圖：Shutterstock

以上文章刊於《招職》。