返工嘅動力基本上分為，最根本嘅要維生養家，到努力賺錢脫離貧困生活，開始享受名利帶黎嘅特別待遇，再一直去到最頂層追求工作上嘅成就感，點樣令到自己Head住嘅Team甚至成個部門喺公司「響朵」。

就好似我嘅部門主管咁，一份工打到老，做足三十幾年。如果叫佢跳出而家做緊嘅機構，以佢嘅學歷，一定無可能繼續搵到呢份令人笑呵呵嘅人工，仲可以日日準時收工伸手截的士接載返屋企咁巴閉。喺等緊退休嘅同時，就算做錯咩大件事，經理級都唔敢向佢大動肝火，更加由得佢平時以下屬出氣為樂，所以佢好鍾意返工，對人總係一臉幸福笑容。

每月嘅Team meeting總結都係同一句「唔好當工作係一樣工具，你要當佢係身體一部分，係屬於你自己嘅，咁先識得點樣令佢愈來愈好」，如果我仲係一個Fresh grad，或者會相信呢種癡人說夢。除非你係做Sales搵到客仔可以有額外佣金收，先會想盡方法多勞多得，否則做一個喺Office加班無補水嘅白領，講呢啲有咩意思？

先唔諗自己會唔會選擇長做，突然一個裁員潮殺到，就算你平時幾咁有心機去寫Paper，金睛火眼Check report，好勤力日日整理Files，臨瞓前仲度緊橋第二朝開會用都好啦，為自保無人會願意企出黎幫你擋劫。現實就係工作上可以取代你嘅人多的是，大家都認為有料嘅，自然會搵到新嘅據點。而你喺電腦排列好晒嘅所有Template和Reference，只會白白送俾你下一手享用。

阿Head又不停灌輸我地「要感恩得到一份工作，如果你唔出盡力去付出有嘅能力，就會對唔住俾機會你嘅人」，簡單黎講，要完美地完成所有工作兼討佢歡心囉。係嘅，工作機會未必輕易得到，不過公司同員工係互相需要，可以請到一位肯賣力嘅好員工，亦係公司嘅福氣。

佢就明白遊戲應該係點玩，曾幾何時，一定同我地一樣辛苦又受氣。就係捱足咁多年，終於沾上老油條嘅光，唔使再面懵懵去托人大腳，唔使再爭取出鏡機會搏上位，唔洗再怕突然被炒魷魚無得撈。講句「俾機會啲細嘅學下野」，就可以卸除一半Workload。各式各樣嘅食飯俾面派對，要俾錢嘅就奉旨唔出現，睇啲經理識唔識「敬老」啦！工作上有出錯，當然出動A字膊，大家明知真相又奈佢唔何，佢就活生生將自己嘅幸福建立係人地嘅痛苦身上。

小熊好卑微，返工的確為份糧。曾經有好多被自願嘅Add-hoc task有認真落手落腳去做，但係結果係無人知道額外付出之餘，仲要被壞心腸嘅同事耍。一發覺有呢啲現象，請即時抽身！唔想返工前一晚再心驚膽跳，就要保持番個距離，無須事事上心，離得開一啲，反而對成個工作環境入面自己嘅角色睇得更清楚。其實小熊返工無遇到大災難，已算係萬幸中嘅大幸啦。