幾年前，考完試仲未畢業就見得成第一份工，當時抱住小學雞嘅諗法，可以盡快搵錢比到家用，又可以威比未搵到工嘅同學仔睇！

作為職場新人，就如一張白紙，唔了解辦公室嘅權力遊戲，每日自顧自做完手頭上嘅工作就準時放工鬆人。自成一國嘅人事部，對於玻璃門外嘅同事嚟講，佢地一直以為要處理大量保密文件嘅部門必定係忙得不可交加，躲喺玻璃門內對住電腦做到火紅火綠。呢個假象進一步提升咗人事部高高在上嘅形象，更有唔少人不自覺會討好我地，希望收到多啲內幕消息或者喺佢地上司面前美言幾句，年少無知嘅自己當然亦都沾上少許自傲感，行步路都輕挑咗！但係見慣世面嘅上司反而會加強戒心，心知肚明被捧得高亦會跌得傷嘅道理。

愈接近高層嘅崗位其實愈危險，雖然部門實行輕鬆嘅工作文化，但係的確要作出唔少重要嘅決定同要謹慎處理所有人事。當時自覺自己不過係小小嘅助理，有咩唔識都有上司無條件出手相助，危機感極低。

直至有相熟嘅同事快要離職嘅時候，睇唔過眼我實在太純真，提醒我其實辦公室總會有無聊人喜歡興風作浪，職位如清潔茶水姐姐更唔可以睇少。「你諗下，佢地每日三次捧茶比老闆，可能順便就報告下對我地嘅所見所聞，所以你咪咁傻講咁多自己野比人知。」無知嘅小學雞要領略更多所謂職場上嘅陰謀論！

「仲有保安叔叔，知道晒大家出入時間，你唔會知佢地幾時講漏嘴邊個出咗去食支煙、買咖啡，更莫講話遲到早退嘅事。」一聽完頓然精神緊張起嚟，原來小學雞一直唔知自己隨時會踩中陷阱，仲幼稚地以為得到一份朝九晚五半嘅工就放心晒添！

由轉第二份工開始，無人會再對待自己係小學雞，唔留神行差踏錯、碰壁，小心立即落入為被攻擊對象！喺返新工前嘅一星期，要開始調節心情，喺未知嘅新環境先做好充足嘅心理準備。唔好再單純帶住想學習嘅心態，而係考慮自己可以點樣盡快上手、適應、再話咩人知你嘅價值！

做小學雞係有期限，隨住自己得來嘅體驗，要逼自己由溫室走出嚟。如果唔係永遠無進步，仲會被人笑足一世！ 

以上文章刊於《招職》。