做公營機構嘅HR喺比Offer方面好輕鬆，跟足Pay point，無得討價還價，拎起手打電話好放心跟Contract講解一次所有Terms & conditions就搞掂，對方喺我地出招聘廣告時已經清楚人工有幾多，如果一早覺得唔係心水嘅價位，就連申請嘅時間都可以慳返，方便彼此。

壓價嘅Offer你以為只會出現喺有返咁上下人工嘅Post就錯啦，小熊曾經有個舊同事阿菲一齊初出道做Assistant，做咗兩年，為咗想學All round嘅HR工作，膽粗粗去搵工，只要可以有大啲嘅發展機會，即使都係做Assistant亦唔太介意。話晒叫做有兩年工作經驗，而且要返埋星期六，人工點都唔可以平過咁蝕底！咁諗都好正常啫！

轉工過程似乎好順利，申請完好快就有電話通知Interview，間公司喺香港嚟講算係大規模，理應Compensation package唔錯，有生日假、婚假和考試假，講到好注重員工嘅Work life balance咁。過咗Interview，阿菲幾有信心會請佢，仲唔停口講由大門一直行入去Meeting room時睇到員工工作環境幾好，雖然座位細咗啲，不過啱啱裝修完，好新淨，又用咗好多玻璃門設計，透明度好高，感覺開揚舒服。

果然意料之內兩日後就收到Offer，人工係阿菲嘅預期，所以算係一口答應咗，快快手遞埋辭職信。點知就喺當晚，放工後再收到HR電話，「唔好意思，阿菲小姐，我地而家準備緊你份合約，人工方面呢，因為新一個財政年度公司Budget緊絀，會有少少調整。」係人聽到都心知不妙，咩調整？一係減人工，一係減福利架啦！「係咁嘅，本身傾咗你嘅人工係一萬二千蚊，而家會調整到一萬一千五百蚊，請問有無問題？」呢個藉口令阿菲惱羞成怒，佢轉工都不過加二千蚊人工，減五百蚊絕非小數目，真心想問句︰「每個月減個小薯仔五百蚊究竟幫到公司啲咩呢？可以買多幾罐咖啡粉呀？」

面對壓價Offer，究竟阿菲會點揀呢？下一次再續。

圖：Shutterstock

以上文章刊於《招職》。