經過一次又一次嘅失落，今次終於落入Waitlist嘅後選名單中，雖然完全揣測唔到究竟自己成數有幾高，又唔知身在隊頭定隊尾，未值得高興但至少得到一個假希望。

Waitlist等於大後備，最後能夠晉升到「坐正」嘅位置，係需要配合天時地利人和嘅強運！正選拒絕Offer，又或者同部門突然有人遞信辭職，公司為咗唔想再重新洗錢出廣告接收申請，就喺Waitlist度試下抽唔抽到支好籤，機會就係咁樣落喺你身上。係被稱為難聽嘅「執二攤」嗎？入到公司，俾身邊既同事知道你係Waitlist入嚟，即時睇低一線，「Waitlist啲二打六都入到嚟，真係好好彩囉」，「猛車邊有咩咁巴閉，可能做一陣就捱唔住」。其實一切跟足晒程序做，後備正選都係一樣。由當初申請份工，到老闆認為佢夠料可以俾一個面試機會，再心驚膽顫面對Panel連珠發炮嘅問題，同樣嘅經歷，結果無辦法操控，仲比其他人承受多一重壓力，走多一步先嚟到。係老闆嘅決定，無使出旁門左道，旁人又有咩資格認為Waitlist一定差過正選？

喺我哋嘅角度，面試不過係一個印象同埋過程，並未代表佢一定適合做呢份工。有部分人面試技巧係特別出色，識得Sell自己嘅優點，而且好健談令你想繼續同佢傾多幾句。而工作態度和實戰表現呢？即使做Reference check，而家好多大公司都講明「基於保密理由而不公開評核資料」，令我地難以短時間判斷到佢過往喺實際工作上係點。有經驗嘅經理們，就心水清即使揀咗以為最啱心水嘅一位，一日未簽約確認Offer，一日都需要抱住中獎心態。而Waitlist正正就係為咗填補大獎隨時不翼而飛嘅情況而產生，所以Waitlist同樣會認真揀，揀唔到嘅寧願唔要。

入咗Waitlist既通常好心急知結果，打電話問人事部唔會有任何答案，小熊都好了解你十五十六嘅心情，不過保持口密係我嘅既專業。唔好咁傻無了期去等待，先有定心理準備機會係極渺茫，要提醒自己繼續馬不停蹄去搵到有Offer為止。跑唔出唔緊要，撲左個空囉囉攣嘅心情會更有動力去諗番究竟差啲咩先贏到，係未能好順口咁清楚介紹自己？應對唔到問題？抑或身體語言唔夠大方得體？

「名正言順」係打工黎講唔係咁重要，大家一向都知王親國戚，心儀嘅靚仔靚女，可以純粹因為老闆鍾意就可以發圍上位。一間公司成個申請入職嘅過程已經算係最公平嘅一關，入到嚟點樣去建立形象、人事關係和爭取表現先係最大嘅挑戰，所以入Waitlist唔可怕，最可怕係一見到呢個字就立即打擊自信，以為技不如人。