早前一位懷孕30周嘅外科護士，當夜更時突然腦中風需要深切治療，雖然無深入探究究竟媽媽係為咗咩原因而自願去當夜班，但係無辦法唔佩服香港上班族嘅媽媽，因為各種嘅考慮，幾辛苦無得休息堅持硬住頭皮工作！

即使係大規模嘅公司，亦唔能夠只單憑用金錢就嘗試解決人手不足嘅問題。人心肉  做，同事幫手唔放假返足幾更，缺乏休息下工作其實無效率又更容易出現失誤。假設無同事願意幫懷孕同事頂夜更，職場上為免非議，一般打工仔都會無奈地選擇自己去承受多於出言拒絕，唔希望製造一個機會被小人冷言冷語對待。

曾經，有位上司霞姐有身孕，本身已經安排好前四後六嘅產假，最後因為有老闆開到口要求佢放前二後八，喺月尾最忙碌嘅日子要計埋糧先放得假。心軟嘅佢唯有同我地幾位下屬拍住上計數和核對拍卡紀錄到深夜12點，著住人字拖鬆身衫褲嘅佢，以最舒服嘅衣著令自己輕鬆啲，又不停滴眼藥水捱眼瞓。我地留意住佢嘅狀況，偷偷見到佢不時流晒汗托住籮咁大嘅肚，坐唔安企唔樂咁，我地強烈要求佢準時放工回家休息，唔使佢掛心啦；但係始終老闆唔會放心得落，佢又唔敢反抗。見到佢依然展現微笑對住我地講唔緊要，心好酸。好多上司喜歡「人無恥便無敵」嘅作風，只要夠厚面皮，壓榨同事係等閒事：「霞姐，我地無咗你唔得  啊！上次想搵返個陳年高級人士嘅P file，最後只得你先知道放喺邊咋，仲有呢，好多分析報表都係你想當年一手一腳製作，全係你嘅親生仔嚟架，無你睇實班友仔做，一定錯漏百出！」喺「一啖砂糖啖啖屎」嘅情況下，唔想生事嘅霞姐只有聽命留守。

直到霞姐終於放產假在家休息，都放唔低公事，要我地繼續說明工作嘅進度和速戰速決咁回覆電郵，精神緊張和抑鬱開始佔據咗佢嘅腦袋。直至返咗嚟，佢一掛住仔仔會快速拎電話偷睇下相，聽下錄音，想正常放工時間享受天倫之樂難過登天。

兩個月後，霞姐毅然決定轉工。

響徹我地心扉嘅，係一陣陣替佢感到可以解脫嘅歡呼聲。再聚舊時霞姐容光煥發，好雀躍咁話比我地知轉工後，雖然人工無咩上調，但係遇上絕對信任佢工作能力和識得關心員工嘅好老闆，模仿外國形式，營造公司準時放工文化，大家只要做好手頭上嘅工作請唔好扮工，亦唔會強人所難去做無謂嘅加班。仲有提供哺乳嘅支援設施比媽媽同事上班時間泵奶，大大加強咗霞姐對公司嘅歸屬感，出現返真心嘅笑容，係我地最期望見到嘅畫面。

喺小熊心目中，在職媽媽比職場女強人更有韌力同耐性，時刻要一心幾用，一邊專注工作，一邊計劃好小朋友日常嘅安排，幾時飲奶、邊位家人負責湊仔，屋企嘅奶粉濕紙巾尿片嘅存貨等，腦用量比我地超出幾十倍！小熊未有福氣做媽媽，不過都要有時間訓練自己極速做好Multi-task，將來要孭起更偉大嘅母職！

以上文章刊於《招職》。