做得上司既，柯打就等同「老師話」。80後嘅我地細個成日玩呢個經典小遊戲，一聽到「老師話」，就要快手趣腳跟住做，做得最慢果個就會被淘汰。由細已灌輸要「聽話」既心態，對長輩永遠要客客氣氣，對客人被指住喝罵要保持笑容，對老闆更加係唯命是從，佢地「永遠是對的」。

初入職時候，不得已信呢一套，因為自己咩都唔識，無Bargaining power，只可選擇調整心態去接受。腦入面嘅天使不停講「當儲吓C.V.」、「捱到上去到時自己話事」、「比心機啲做人地有眼睇嘅」，就默默埋頭苦幹，將上司每日嘅「老師話」完成，以為功德圓滿。上司有個咁乖巧嘅下屬當然唔會放過任何一個「畀你學野既機會」，新仔通常寄予幻想上司係咪有意升自己所以先俾更多重責。唔排除有呢個可能，不過要花幾年時間守候突如其來嘅機會嘅同時，第一步要了解上司意向，究竟你嘅幻想有幾多百分比會實現到呢？

愚蠢的上司，眼見下屬咁聽話就會心急起黎係咁Push，「老師話」愈黎愈苛刻，要求愈黎愈高，工作量愈加愈多。去到咁嘅局面，稍為有志氣會唔甘心開始搵定工，覺得只係做呢啲Assistant位，出面市場大把空缺。做夠一兩年即刻拜拜，想搵番Yes man就睇你彩數，仲要重新Train過。如果個下屬怕搵工繼續做，相信佢嘅歸屬感迅間跌到負數。打工仔係好敏感，對待一差，心態自然就會變。明明自己係呢個Post已經做足，幾有效率都係無得準時收工，幾有心機做，上司都係黑口黑面，仲邊有動力？倒不如為自己諗多啲，Hea吓啦，反正情況一樣，唔會被炒，人工照收。

聰明的上司，識得喺適當時候利用溫柔既腔調向你講「老師話」。柯打可以係沒完沒了，令你工作到天昏地暗。想長遠地「物盡其用」？就要得閒向下屬「派糖」，唔使花錢，又唔使聲明會有晉升。「阿熊，今次活動啲佈置做得好靚，有新意，好多人都爭住影相，黎緊個Project都靠你啦！」，「份Report做得好仔細，個Deadline咁急你都搞得店，真係唔該晒你啊！」先唔理係咪同事實相符，但聽入耳心都暖埋。習慣左開口去讚美，係人都會受落，無成本之餘仲可以為自己形象加分，何樂而不為？

溫柔咁去發揮「老師話」，留人才去幫自己，兩邊都有得著。E.Q.夠高，對身邊嘅人諗多一步，你咪就係真正嘅老師！