喺呢個年代，Email已經唔係新科技，但係每個人畢業後出嚟工作先叫做正式開始用上Official嘅Email。喺呢個時候，大家先會感受到Email嗰三大功能：「To」、「CC」及「BCC」嘅威力！單從呢三個功能嘅名稱睇，當然好似冇乜特別，但係背後嘅深層意義，好多打工仔起初因為唔知，所以成日會用錯而瀨嘢！

你出個Email係比邊個睇、邊個需要Copy，喺Send出去之前真係要諗清諗楚！我諗唔少人都經歷過因為咁樣而被老闆、同事、同埋Partner等鬧過一鑊金嘅！要知道「To」同「CC」基本上係代表收件人責任上嘅等級，其實「To」係好難會Send錯比人嘅，但係「CC」就真係要靠大家嘅智慧啦！

唔知有幾多人好似我咁，以前做細嘅時候唔識世界，每次Send email出去時，諗起條Team有咩人就「CC」晒落去，完全冇諗過被「CC」嘅人有咩感受，最終「CC」咗啲唔應該「CC」嘅人，好彩嘅話對方會私底下Send返封Email話你知唔需要再「CC」佢。賤格啲嘅就會喺你背後講你壞話：「做嗰小小嘢都要話晒比全世界人聽，搏乜呀？！」、「明明唔關我事又要拉我落水，呢條友都黐孖筋嘅！等我下次有咩都CC埋佢睇吓佢仲敢唔敢！」

不過，呢啲嘅傷害性永遠都唔夠「BCC」呢個犀利！呢個功能真係令人又愛又恨！想比某人知道但係又唔想其他人知道呢個人原來係知道嘅。簡單啲嚟講，咁樣同喺人背脊講壞話有咩分別呢？

辦公室入邊冇乜人係唔八卦嘅，就等同有邊隻貓係唔食魚嘅一樣！公司入邊愈多貓，你要小心嘅程度就愈高！唔知有幾多人好似我咁瀨過嘢？真係白痴仔拑錯掣走去Reply「BCC」比我嗰封郵件！無論點講都好，「BCC」得你嘅，就係相信你嘅人，你一個唔覺意Send佢去死，你話你仲可以喺公司生存幾耐呢？因為「BCC」你嗰個人一定從此當你係殺父仇人！

以上文章刊於《招職》。