新一年，Office入面唔同部門都有機會被老細叫做Budget。揸住個Excel表同你對來對去，其實佢哋就好似去買餸嘅C9一樣，尤其疫情之下，個個都想慳得一蚊得一蚊，最好就送埋唔使錢！最經常聽過嘅一句說話就係「冇Budget」！

當然各位老細都唔係傻嘅，冇Budget呢句說話係唔會第一吓就同你講。最常見嘅兩種情況就係：

1. 我個Budget只係得咁多，你哋同我計條數點樣去做啦！

2. 嚟緊我想做呢啲嘢，你哋幫手諗吓，比個Budget plan我睇睇。

個個都以為第一種情況會容易Handle啲，但係我話你知，呢種情況其實都係一樣唔容易對付。你要好清楚老細其實心目中比個數出嚟，係要你唔好用晒佢，用得愈小而成效愈大就最好。喺你個Plan入邊，你老細會好似核數師咁逐條數同你對，不斷Challenge你每一條數點解要用咁多！記住千祈唔好用Agency，如果唔係你就大鑊啦！你將會聽到「我比咁多錢請你返嚟做咩？仲要比錢人哋去做你嘅嘢、你傻㗎！」嗰下真係百般滋味在心頭，我心諗：你老細比嗰雞碎咁多錢要我做Agency先做到嘅嘢，唔係我傻喺你癲至掛！

如果遇上第二種情況，就真係仲Poor guy！大佬啊你淨係話想做一樣嘢，乜都唔同我講，我點知點做？我又點知要使幾多錢？同一件事我可以做到好大，使你幾千萬都得，但係原來你只係有幾千蚊Budget，咁我咪中晒伏？！

我畀啲老闆蹂躪咗咁多年，交過無限咁多份Budget，結論係Budget呢個字正確嘅中文翻譯應該係「不值」！因為其實無論你條數計得幾好，你老細點都會嫌貴，其實最終都係想要壓價！只要你諗吓有邊個C9去街市買嘢係唔會講價㗎，咁就會明㗎啦！