升職加薪係打工仔都夢寐以求發生嘅事，與淨係加薪相比，升職其實難度較高。唔知大家有冇同我有過同一樣嘅經歷呢？辦公室內成個大形勢，包括自己、同事甚至係老闆都「好似」明示或暗示你好有機會升職，但係突然間殺出個「程咬金」無端端有個新人嚟咗坐咗你想升嗰個位！

當知道有個Senior啲嘅位騰空咗出嚟，如果覺得自己係有能力嘅話就會開始有遐想。同事之間見到你好努力咁博曬命做嘢、搏表現，你就會開始不停係耳仔邊聽到啲同事話個位應該係你㗎啦！甚至乎同老細開會嘅時候，佢都喃喃自語咁同你講：「你做嘢越嚟越叻、越嚟越醒，我覺得你進步左好多，俾啲心機！你好有機會升㗎啦！」聽完之後不期然就會沾沾自喜，加強晒自己嘅信心！

但係事與願違，當公司甚至乎係之前讚賞過你嘅老闆突然間宣布呢個位置已經請咗新人返嚟嘅時候，我仲白痴到即刻睇吓個月曆究竟今日係咪愚人節！成件事令到我好失落，心諗如果你唔係俾機會我你就唔好講到好似我好有機會咁啦！情況就好似一個女仔以為佢男朋友就快同佢求婚嘅時候，突然間個男仔同你講佢諗住搵多幾年錢先，儲夠錢先至講結婚啦！你話兩者有咩分別呢？

不過如果自己係醒目嘅話就應該知道，老細之前講嘅說話只不過係放喺你面前嘅一條蘿蔔，等你隻馬跑得快啲！你再細心分析一下老闆之前同你講嘅說話，其實佢根本就冇暗示過佢會升你！佢只不過同你講「你好叻！進步咗好多！」最重要係佢話你「好有機會」升，記住佢話係「好有機會」咋嘛，你就唔好死蠢當一定係你咁至得㗎！再思考一下市場上面唔係咁好景，啲人可能降低身價搵份工做，你話你老闆計過條數會唔會請過新人返嚟會抵啲呢？開講都有話，最叻最做得嘅唔一定係最有機會升！因為如果升咗你邊度搵返個好似你咁抵得諗、咁做得嘅人呢？

文：Johnson Lo