踏入新一年至今，大家都應該知道獲加薪幾多，或者有無得升職。如果兩樣都落空，與其抱怨撈極都唔起，倒不如考慮一下轉行做Sales。

超級富豪十個有九個都係Sales

提起要「發圍」成功，大家可能會即時諗去進修增值，例如讀一個MBA，又或考會計、IT專業資格部署跳槽轉行。不過身處商業社會，你有海量知識，卻不懂得推銷自己，仍可能難以擺脫撈唔起惡運。

所以治本之道就係學推銷，千萬唔好睇小推銷這行業，股神畢菲特，他童年時就懂得向鄰居及同學仔賣糖果汽水賺外快。萬人景仰的蘋果教主Steve Jobs及微軟創辦人Bill Gates，他們都是公認出色的推銷高手，即使今時今日Bill Gates正職係環保救地球，他跑到各國開展這項工作都係靠Sell。

Linkedln一項研究顯示，原來該平台1.2萬間企業的CEO履歷中，銷售經理是他們最常出現的第一份工。可見掌握銷售技巧，是燃點成功引擎不可或缺的燃料之一。

「賣大」不如「賣細」

既然放心一搏做Sales有助突破事業悶局，下一步係咪立即走去做最熱門的物業代理或保險經紀呢？皆因這兩行出名一擊即中，佣金收入就好和味。不過要留意，正因為潛在收入可觀，這兩行早已高手雲集，入行後發現唔夠人爭，你未學識推銷就已經鬥志消沉。

所以起步時不妨記著賣「大」不如賣「細」原則，簡單如在百貨公司攤位推銷家電，已足夠訓練你熟記資料、摘取重點再生動地表達的本事，更重要日日面對顧客冷待或埋門一腳反口唔買等情況，很快個人EQ就可以大提升。

昔日Steve Jobs在新品發布會舞台介紹產品，做的其實是同一件事。Netflix創辦人Reed Hastings，他亦曾表示很享受早年逐家逐戶上門推銷吸塵機的工作，因為可以認識各式各樣的顧客。而且熟書、消化重點、簡潔又吸引地講解，正是今時今日人在職場上位不可或缺的技能，你跑在前線做推銷累積到的功力，一定勝過躲在辦公室間中在會議負責講解的對手，既有得秘密鍛鍊，又有得賺錢，把心一橫轉戰推銷，可能較繼續在工作崗位自怨自艾來得有意義吧。