年尾要清假且節日氣氛濃厚，唔少打工仔都會選擇聖誕新年出門去旅行。當你訂好機票酒店後，緊接一步係實踐出門旅行「前四後六」工作法則。  

所謂「前四後六」法則，是出自香港影響力最大的生活哲學家黃子華，他在早年的棟篤笑曾提到，香港打工仔去旅行要留心「前四後六」，即係出發前四個星期及回港後六個星期都會做到嘔。 

現實情況係擁有一份收入唔錯的好工，大家都不會貿然玩裸辭去旅行，所以好好交低手尾，出門旅行就唔會成為你得罪老細、同事甚至無咗份工的導火線。先分享出發前四個星期的「前四」攻略法則：  

審視工作類別及進度 

打工仔手頭工作通常分兩大類，一類係每日都要處理的恆常工作；另一類係橫跨數星期或數個月、需要同事協作的項目。前者可以事先與上司商討，安排同事在放假期間頂替處理。  

至於後者，不妨先列出一張清單，列出可以在放假前K.O.以及要橫跨假期的項目。前者就在出發前奮力搞掂，後者則盡量處理假期前要完成的進度，再與上司溝通，交由同事繼續跟進。 

設定溝通規則 

去旅行最沒趣係被同事轟炸訊息、電郵，職場上總有唔通氣又貪方便的同事，即使你事先清掉手頭趕急工作，又交帶好同事分工安排，仍會有同事三不五時就著工作上的小問題密密聯絡你，令你旅行樂趣大打折扣。  

要解決此難題，可以在出發前與同事們設定溝通機制。基本一步在放假電郵寫明涉及恆常工作的事項，可以聯絡暫時頂替的同事，並列出相關同事的聯絡資料。至於自己所屬的工作小組，亦可以在出發與小組成員協議好，自己每晚會在甚麼時間查閱電郵及與工作有關的短訊，這樣同事們都會有個預算，你大約每晚會在甚麼時段回覆與工作有關的查詢，而不會在日間時份動不動就進行電郵、短訊轟炸。 

「後六」：如何還人情？ 

順利叉電回港，返到公司例牌大派手信，唔少打工仔以為做完這一步便還清人情債。  

此想法有兩大不足之處，一是綜合在職場享用手信經驗，好味的手信難求，平均來講都係一般甚至伏伏地。二是只派手信，對放假期間幫得你特別多的同事就稍為唔公平，分分鐘同事心底會埋怨咁辛苦幫你為乜？！ 

始終人在職場，對同事多過對屋企人，派手信只係基本一步。對於捱義氣分擔工作的好同事，既可以額外贈送在旅途上精心挑戰又切合他們喜好的禮物，再請他們食晏慰勞一下，相信同事們都會感受到你答謝人情債的誠意。  

接下來幾個星期，固然由頂替同事接回恆常工作，亦應該把握機會幫輕同事多一點，展示自己有來有往的誠意。出門做好交帶工作及還人情債工夫，日後再次旅行叉電，同事們都應該會樂意再次頂替你的工作，人在旅途亦毋須擔驚受怕憂慮工作「爆鑊」風險了。