讀者陳述A：同自己講一定要買好穩陣的藍籌股，並摒棄短炒陋習。

之前筆者有些案例見其他人話揸足大藍籌多年，成手蟹貨，已證本案讀者做法有商榷之處。

短炒對九成九人而言係唔好，但筆者亦唔同意買好穩陣的藍籌放長線就是法門。股票的本質就係唔穩陣，因持股人是夾份做生意。當年佢2009年跌到40元股而叫你28元供股，筆者當年在銀行目擊不少人大叫「騙局」，本文撰寫目的亦是想提醒只經歷了2009年金融海嘯的各位，當年只屬小兒科。「沙士」才叫大風浪。所以用10年股齡去認定騰訊是終身伙伴而長揸，都唔好講每年升30%的「預算」是否合邏輯，惟將自己40歲的生活寄託於單一股票，實太不智。馬化騰就可以將佢生活寄於一間騰訊，因為人地已經喺外國邊處買咗屋同成立咗Trust了。

讀者利用Constant factor去做Projection，是香港教育的錯。

滙豐10年由142元跌到而家2017年升返都只約72元

穩如煤氣 ( ^0002 )，2007至2017年由8元升至14元，加埋紅股同息，10年一個Double，其實唔算升好多，因為物價都齊升。 

讀者陳述B：騰訊基本因素佳，不太受經濟週期影響。未來也是手遊、雲端及AI高科技的世界，可長期持有。

就算未來是手遊及移動通訊科技之世界，馬生都可以將新而又賺錢的生意打落另一間公司上市做，咁騰訊就享受唔到個升幅。至於經濟周期，確實支付類業務有防守性，但手遊業務不時被詬病收入太多水份，在大市向下行時會否最快「現型」，很需觀察。

讀者陳述C：買樓收租成本不菲，有物業稅，遇租霸，差餉地租管理費、維修，成本比較大。

同意買樓成本高，不過你可以先借錢去控有物業收租而近乎定額供樓，呢個就係股神巴菲特喺CNBC講30年按揭係最好投資工具之道理。筆者早已陳述買樓唔係必須，不過你趁銀紙大貶之前問銀行借錢係有著數，而香港銀行一般只予住宅拉長30年嚟還的選項。當然除了住宅，有其他投資物是可以攤30年還而按到八至九成的。

留意筆者唔係要比較樓定股好。總之後生少錢用股搏，股票需投資人識睇中盤生意去迎急財的。股票從來沒慢慢賺或長放呢回事，因股市如戰場，正如老兵終需死，若閣下唔想死，就快手打完仗即返屋企。

後生而較大的金額，應放住宅。因住宅可助你出畢菲特絕招，單向買美金跌。筆者同意買美金內含值跌，贏緊九成，惟要將大碼美金沽空需要買樓加按揭，要你夠後生先等得20至30年見成果。

老而又大的金額，可用債。因人在45歲後已難做30年按揭，故到期保本的債是好朋友。

老而又少的金融，有家底者可用股票，無錢中年反應保守，用ETF或REITs吧。中年而又無錢者，只怪你後生應搏唔搏，搞到中年無本錢。那點搞都只可小康，都係老土呢句：「各有前因莫羨人啦。」

至於讀者，現居應欠約350萬，應行一拆二按爆八成，套70萬元﹙因HKMC二按盡借只420萬元﹚。再將70萬元加手頭現金行債基疊增方案收息，計150萬元資金，每月收息12-15%即可收15,000至18,000元月，應夠補貼自己想住三房的支出。當然原本按爆間樓要偷偷地租出去，佢自己衝量風險。不過既然讀者咁怕使費，那筆者作法可省下買810萬元樓的幾十萬元印花稅，此金額已夠佢租樓兩年。

再重申一些免費而又隊到埋你嘴邊的方案，才是害你最深的。若股市在往後一季重新升穿28,000，大家更不要掉以輕心。之前愈瘋狂，往後愈墮落。

以上文章刊於《招職》。