本人月入約60k,太太18k, 整個家庭收入約80k，股票及現金約有600k儲備，現與一對子女同住於未補價的彩X苑高層單位。

早前睇過慈雲山寶發大廈，新葵芳花園，淘大及第一城的細單位打算收租及增值，因以上單位攻守皆宜，而且是密集盤，現又將視綫轉移到兆康，因為發現其樓價竟然尚有4球內交易，另一邊箱亦有考慮將居屋補地價，但現金應該唔夠。

想問現時買多層樓，是否正確時機?以上屋哪個比較出綫?抑或我應先補地價，將現時層居屋的轉按，貸款功能再買?但咁做可能要花我兩年時間。

謝謝解答


答:
好時機唔關樓市升跌事，而係讀者需要用樓去槓大資產幫佢加快儲蓄。月入6萬仔女都有成對而儲蓄只60萬，說明了讀者唔用外力幫忙根本儲蓄難再上層樓。

唔買樓，炒股大賺如何? 
近月我在證券行的朋友都較空閒，早前炒股大賺的生活已過，要在股市持續賺錢，或者希望透過股票將你1變4再變12的機會係有，但萬中只「幾件」。要試最好廿幾歲去試，而唔係讀者有家室之時。

另外諗sir見炒股成功的人無論在行為或性格上都屬獨特，見股市都是大部份人輸錢，因此只有行為及想法少數的人才能生存，坦白講睇年報或者睇新聞做過些大路野想炒股大賺的，成功率更低。

買樓真是對嗎?
頭兩間樓，到老1自住1收租是必需品，你可以在樓市比高位低10-15%之時，用20%首期上會，風險就很低。原因是比高位低10%時用20%首期上會，即樓價比高位直跌30%係才「負資產」有機會被銀行call loan。

樓價大跌超30%，近30年來只在97-99年試過，高位跌40%。而當年炒股極盛，樓市有「摸貨」。現時樓市月成交只5-6千宗平均，同當年比只小巫見大巫，故預買完跌30%安全系數足夠。而現時中原城市指數在180點左右，比高位190點低約6%，即係如果你搵到盤比市價低5%，不妨出手! 

如何開始?
如果實力充足不妨居屋都賣埋，套錢去夫婦一人一間入兩間私樓。始終私樓日後加按易，你易加按才可將樓一繳二再完成三宅。另外私樓叫價易升，開則亦易累到有錢人。上星期諗sir去左雅濤闆睇樓，三房591開則房大但廳細，而其中一個廁更是沒沖涼位，呢類則係實用，省係個廳而大係個房。不過此等開則開價到咁價位即止步，鐘意招呼下朋友或者要點面子的人唔會要。人都係第一步求實用，下步求體面，再去先面子同話比人知有幾奢華，而居屋是實用層。若你認為家庭收入主要在30k-70k上落，咁不妨居屋。