問：

諗Sir你好

本人剛上完收息101堂，有關收息問題想請教一下。

本人今年44歲，月入大約46,000元 ( 36,000 Basic + 10,000 Commission )。單名有第一城物業市值590萬元，尚有300萬元按揭 ( H+1.7或P-2.85 )，月租收入11,000元。

太太40歲，也是Salesman， 月入大約60,000元 ( 36,000 Basic + 24,000 Commission )。單名有一大埔物業市值670萬元，尚有145萬元按揭 ( H+0.75或P-2.75 )，自住。

現金30萬元，想問：

1. 如果想月入收息30,000至50,000元，可以點做呢？

2. 如果想一生三宅又可以點作準備呢？

謝謝賜教

答：

如果只得30萬港幣，是沒有穩當方法去產出月入3至5萬元的，我地又唔係賣嘢不怕照直講。筆者亦唔會教你甚麼年年用股票賺15%，見股神巴菲特長年平均回報都只約20%* ( 唔派息計 )，真不敢叫你信自己操盤或跟人買股真可長年達15%均回報去成就財務自由。何況處理好錢的事，係咪成世人就一直掂到尾呢？所以本欄不只同你談錢財事，更告知薄有資產後會發生甚麼事。

* 巴郡52年複式增長率為20% https://bit.ly/2yTI9Cn

當然讀者有樓，不只30萬元，那想法就可大一點。各位年輕人留意，呢個月入46,000元及太太60,000元，成家人月入超10萬元的家庭，做足廿年嘢只儲到30萬元在手，最尾發圍都係要靠樓。我地唔係要宣揚「買樓日日賺」，諗買樓可以靠賺價差去發財未免把自己想得太高，而家買樓的人賺的是

1. 買樓逼佢月月儲唔使花晒喺旅行。

2. 買樓先借港元再攤長供等於沽空美金，此舉食正老美印鈔大勢。

如果有人唔做按揭上會買樓，就當2013年買中升得最勁的細價樓區份，而家四年幾只係賺咗一倍。你要留意四年前，騰訊100蚊一股都唔使，剛成紅底。所以樓其實升得慢，但對抵禦人愛消費的心魔絕對好用。有句名言：「零回報已經算唔錯。」諗唔明點解？大可在Facebook的本Post留Comment「零回報已經算唔錯」，我地再詳細解釋比你知。

第一城可按至六成，得590萬 x 60% – 300 = 套約60萬元。可能講到呢度你諗：「點解唔用買樓003課方法將樓轉比阿媽再按爆八成？！咁就可趁高套180萬元啦！」惟筆者對儲蓄少的人一向很懷疑其理財上的執行力，一陣大錢到手又使走一半，咁真係唔按仲好過按。所以「角度不可拎得太盡、佢都係求射中個龍門先算」不少人閱畢本欄後也發現公司中高層許多也屬理財BB班，這也合理。因政府不會在校灌輸你規律儲蓄模式，而時至今日學子讀書更是每刻在消費，誠如日本人都將消費稅提升至10%，教你班人多儲錢那政府賺條毛？所以大家要知自己係咩位置，未做好儲蓄先在理財上穩一點。

讀者按晒夫婦樓各一可得60萬 + 250萬 = 300萬元，十倍其銀行現金。應將其中250萬元放喺銀行做定期，定三個月1.8%個隻，比佢一季收返11,250元看看錢搵錢的威力。當然250萬元定極都係細數目，但如2,000萬元收1.8%息，一年坐係度唔做都36萬元息了，仲未計之後有息加。另一點就係可自行理解加息是否對業主而言是壞事。筆者認為唔係，除非業主唔加按唔定期，你見若再加兩次息令定期有三個月2.5%？大把人穩收成萬蚊一個月。至於讀者心水係要30,000元月入，做法是300萬元喺手拎250萬元做定期後，剩低50萬元去做收息101的債基B加E餐混合，B餐18%年息而E餐10%，均在14%。50萬元投入自己睇睇係咪可以有50萬 x 14%/12 ~ 5,800元一個月。如果做到再加碼未遲。去到呢度佢自己都識計：50萬元收5,800元，咁300萬元就有30,000元╱月了。另外唔使諗用保本的直債，讀者只可投細銀碼入場而又可隨時贖返現金的投資物。

以上文章刊於《招職》。