又到聖誕！又到聖誕都去唔到派對，因為小朋友病咗要照顧佢！有時可能會聽到家長這樣說，我覺得那些都是非常負責任的家長，好過病咗都照去玩，搞到一是勞累復發，二是食得多派對的煎炸食物，令本身感冒即使快好都又復發。當然，最好就是不要再傳染其他人。
今年溫暖的冬天，終於都在冬至前有了一點點寒意，天氣乍暖還寒，對於小朋友嬌嫩的身體實在難於適應，亦是今年很多咳嗽感冒都好難斷尾的原因。除了天氣之外，亦有勞累復發之說，返學、去玩、工作搞到無時間休息，令身體修復的時間短了，無論大人及小朋友都一樣，會因為勞累而令到感冒恢復得比較慢。上幾篇文章亦提過，要做好保護自己免受感染，或者不要讓自己傳染給家人的措施，病咗記得戴口罩。小朋友病咗，家長自己最好都要陪佢戴口罩，玩時玩，都係身體最緊要，需要休息的時候就要乖乖地留在家！
另外，感冒正正是需要戒口的時候，要戒食糯米製品、奶製品 ( 包括芝士 )、菇菌類、海鮮、雞、鴨、鵝等，如果聖誕大餐中的火雞大大隻，都係少食為妙！記得同小朋友講，聖誕老人最鐘意乾淨，最鐘意咳嗽或打噴嚏識得掩住口鼻仲要即刻洗手的小朋友。
祝大家聖誕快樂，新年進步，身體健康！
以上文章刊於《招職》。
