聽到「開會」兩個字，唔知你有咩感受？如果講得出鍾意返工嘅人係鬼上身，咁講得出鍾意開會嘅人一定係貞子纏身。喺公司入面，無論你係身處高位定係一塊薯皮，難免間唔中都要開下會。開會呢件事有好有壞，開得有意義的話可以大大推進工作進度，但開得冇意義就係浪費緊公司資源同別人嘅生命。成功嘅企業家好似Amazon嘅 CEO Jeff Bezos同SpaceX & Tesla嘅CEO Elon Musk對開會質素都好有要求，但唔知點解好又多老細都唔明白呢個道理，仍要打工仔承受呢啲開會最痛：
1.唔知點解要去開會
有時喺Outlook收到開會嘅邀請，明明想Decline但又一定要Accept。有好多會都好無謂，明明唔關自己事但又要去開，但老細叫到，唔去又唔得。結果浪費時間之餘，仲攪到收工要OT。成功嘅老細明白時間就是金錢，有前SpaceX嘅員工講過，話Elon Musk有一次開會指住一個員工問：「你開會到而家都冇講過嘢，點解你會喺度？」意思即係話如果個會唔關你事就唔該你唔好坐喺度。喺SpaceX一個工程師時薪達80-100美元，唔關佢事又坐喺度就等於浪費緊公司金錢。你係咪覺得如果你老細都咁英明就好？
2.太多無謂人坐喺度
有時你會發現有啲會唔知點解有好多人列席坐喺度，而佢地坐喺度唔知為乜，唔知來龍去脈又無端端插把嘴埋嚟。開會太多人會影響效率，甚至會令人分心。Jeff Bezos就提出過有名嘅兩個Pizza理論，佢話開會嘅人數應該係兩個Pizza一定會食得飽，如果唔係就證明開會嘅人數太多。
3.開會冇目的
公司入面有時有好多例會都可以係毫無目的。例會例會，即係例牌要開嘅會，就算冇目的都一定要開嘅會。最浪費人生嘅莫過於呢種會，定時定候去開，有事嘅就出聲，唔關事嘅就坐喺度聽。成個會漫無目的，淨係匯報下自己做緊乜，遇著有人佔據大量時間，就算唔關自己事都要坐半日先出得返嚟。開會應該係為做決策而開，要匯報的話send個email都攪得掂，唔需要個個坐曬喺度開會咁浪費資源。
4.遇著長氣袋
開會最怕遇上啲表達能力差、說話遊花園唔講重點嘅人。明明想表達嘅意思只係兩個字，但總要花十句說話去講，以顯得自己好多嘢講。呢種人最浪費開會時間，聽佢講多一陣都驚瞓著覺。會議入面有一個都唔掂，如果有兩個以上，一邊要忍住唔好瞌眼瞓，一邊要扮認真真係好痛苦。
5.開會無準備
要會議有效率，每個與會嘅人喺開會之前都應該知道會議嘅目的，而喺開會前都要好似去廸廸尼一樣做足準備。又係SpaceX嘅前員工爆料，同Elon Musk開會一定要做足準備，如果佢問你問題你答唔出就只有自求多福。但喺好多公司裡面，有時啲會嘅目的又唔清晰，開會嘅人又唔做準備，結果成班人坐埋都唔知傾咗啲乜，真係好想舉手話「冇咩事我都係返出去做嘢先」。
