相信大家都聽過，比較傳統嘅日本人會視公司為成就，唔會輕易考慮轉工。雖然日本有好多文化值得我地欣賞，但我好慶幸香港冇呢種職場文化。香港好多老細都嫌後生一輩轉工比較密，成日都話人「咁鬼Jumpy」，但我始終覺得，識得適當地轉工總比唔識轉工、盲目打足一世工好。

1.證明你識得嗌唔好

「唉，我覺得而家份工唔係好啱我，不過我諗住做夠一年先走。」

唔知大家有冇聽過朋友講類似嘅對白？結果過咗一年、兩年，佢可能都仲同你講緊同一番說話，而且仲做緊同一份工。電視廣告都有教，遇到壞人要識得嗌唔好，遇到份唔啱自己嘅工都一樣要識得嗌唔好。就好似拍拖一樣，你明知道兩個人夾唔嚟，喺適當嘅觀察期後仲要堅持喺埋一齊，諗住「拍多年睇下點先啦，話唔定會變好呢。」咁樣其實只係自欺欺人，浪費自己時間。打工都一樣，喺一份唔啱自己嘅工作上面浪費時間先係最傻嘅事。

2.魚唔過塘唔會肥係事實

俗語有云「魚唔過塘唔會肥」，喺香港嘅職場呢個理論相當普遍。我喺HR見過唔少例子，表現唔錯嘅舊同事要求加薪多次不獲理會，但當佢走咗之後，老細會用更高人工去請過另外一個人。可能係因為新人喺外面嘅經驗，比起喺公司內部嘅經驗更有價值、又或者因為後來老細先意識到，外面請一個有同樣經驗值嘅人，冇咁上下人工根本請唔到人。大部分求職者都會要求喺轉工嘅同時，有一定程度嘅人工增加。喺香港，魚唔過塘唔會肥係事實，肯踏出comfort zone嘅人，「肥」係對佢地嘅一種獎勵。

3.經驗比老Seafood更豐富

點解啲老細會用更高人工去請外面嘅人？其中一個原因係因為佢地睇中新人有更豐富嘅經驗、或者希望佢地嘅經驗會為公司帶嚟新衝擊。如果一個求職者有多間公司嘅成功經驗，某程度上係實力嘅證明。「呢位求職者唔單止喺一間公司裡面做得好，佢喺唔同公司都證明到自己嘅實力。」喺Interview後不時都會出現類似嘅評語。日本有一位被稱之為「怪胎CEO」嘅男人，佢叫伊滕嘉明。佢三年就轉一次工，曾經喺Dell將一個虧損咗3年嘅部門喺短短3個月內轉虧為盈，亦喺2010年幫Sony創下銷量230萬張DVD嘅紀錄。轉工可以令人不會固步自封，同時可以畀機會自己喺唔同環境證明自己嘅實力，遠勝不求改變嘅老Seafood。