可以成日喺空中遨翔，四圍遊歷，係好多人嘅夢想；成為機艙服務員 ( 空姐╱空少 ) 就可以達成呢個願望，所以每年有為數唔少嘅畢業生投考呢個職位。不過好多工作都係表面風光，內裏辛苦，究竟自己係咪適合做空服員 ( 空中服務員 ) 呢？不如睇吓行內人嘅心得同埋貼士先。

入行原因其實好簡單？
點解要做機艙服務員，原因可能好簡單，好多人都係剛畢業時，唔知做咩好，覺得做空姐空少幾好玩，所以入行。亦有人鍾意去旅行，或者讀書時已經知自己唔鍾意困係辦公室，做機艙服務員可以一個月內可以穿梭唔同城市或國家，覺得「爽歪歪」。另外都有人係做過其他工作，覺得出面打工好辛苦，貪做空服員多假期，比較自由。

仲有一類人係：原本有另一個職業或興趣，例如做美容、修甲、寫書法，甚至開舖頭，但收入唔夠生活，所以想做多份自由度大但收入穩定嘅工，呢行就啱晒佢哋。

面試要求係點？
間間唔同，學歷方面，本地最大嘅航空公司話就話中學畢業就得，但依家好少請咁後生嘅員工，面試時會反問點解唔再讀書，好多空服員其實都有副學士或學士學歷。至於有一間日本嘅航空公司就要求最少要具備大專程度，所以要睇返每間航空公司嘅要求。

好多人以為淨係高妹高佬先做到空服，其實呢行唔計實際身高，而係計摸高 ( Arm Reach ) 標準，即係除鞋踮高腳摸到嘅高度。國泰嘅要求係208厘米，日航係210厘米，所以手長腳長但生得矮，或者筋夠鬆都有機會，有空姐155厘米都過到關。總之見工前拉多啲筋啦。另外，大家一諗起機艙服務員都覺得係空姐，但其實依家都請好多男仔，甚至佢哋會着數啲，因為物以罕為貴嘛。所以性別絕對唔係咩問題。

外人成日覺得空姐空少一定係靚仔靚女，但好老實講，當中好多都唔係；以國X為例，因為要聘請好多人，所以唔一定要外表好標青，最重要整齊乾淨。不過，確係有航空公司用自己嘅標準揀人，星X對身材、樣貌有嚴格要求。有一間中東航空公司仲誇張，每個新員工嘅照片都要比高層睇過先可以入職；曾經有新同事笑時有酒窩，公司要佢左、右、正面都影相比高層睇清楚，先可以順利入職。其實唔係話要靚，但每間公司有自己要求咁解。

喺航機上，空服員經常接觸唔同國籍旅客及來自不同國籍的同事合作，所以點都要有一定語言基礎，但門檻係比想像中低。香港幾間航空公司只要求識中英文就OK，溝通到就得，即係明白對方講乜，自己可以作出合理回應；不過有飛內地線的航空公司可能對普通話要求多啲。其他國家公司就要睇返佢哋要求，日本的航空公司，其海外員工唔係必須識日文 ( 當然識就更加好 )，聘請後首先喺香港上一個月日文堂，再去日本受訓，到時亦會教日文。

好喇，要點樣先可以申請職位呢？再次強調，國X好等人用，所以全年請人，有時登報紙，或者去佢哋官網都搵到招聘啟示。其他航空公司未必咁密，可能半年至一年先請人一次。如果面試後食白果，唔使太快放棄，隔半年可以再申請同一間航空公司，又或者漁翁撒網同時報幾間公司都得。

香港人除咗揀返本地航空公司，都可以放眼國際，例如有北歐嘅航空公司亦會搵代理公司喺香港請人。但要留意，有啲海外航空公司係要求員工住返該國家，例如星X及有啲中東航空公司都係，所以入職後就要離開香港。

到底見工有咩會做呢？其實係基本嘢，同其他企業一樣，都係小組討論及角色扮演之類，另外都有影片面試，即係比條問題你，要你對住鏡頭回答30秒；都係好大路嘅問題，例如點解揀我地呢間航空公司、點解做呢行，遇上某啲情況點處理，同埋五年、十年後有咩計劃之類。角色扮演就係想睇你嘅應變能力，上各大討論區都有人分享面試心得，可以做多啲資料搜集，溫吓書先。有一樣嘢要特別提醒，就係小組討論時唔好過份表現自己，因為喺飛機上最重要係Team work，好多嘢講合作，唔係自己做得晒。

至於一般航空及廉航，會唔會後者較易入職？其實唔會嘅，要求都差唔多，反而廉航唔會請大量人手，難入啲。

晉升機會點？
作為新人，最初梗係由低做起，即係機艙服務員 ( Flight Attendant / Bar & Cabin, BC )，然後升做頭等及商務艙座艙長 ( F & J Purser, PF ) 或者經濟艙座艙長 ( EY Purser , PR )，再升一級係高級座艙長 ( Senior Purser, SP )，最大粒就係機艙服務經理 ( Inflight Service Manager, ISM )。呢行好處係好穩陣，除非有好大出錯，如無意外都唔會炒。現時空服員可以做到55歲先退休，依家傾緊去到60歲，將來又可以做耐啲。

不過相對其他行業，空服員的升職速度係非常慢，有人話由BC升PF或PR，要儲夠時數升職最少要六、七年甚至十年，原因係太多人等住升，而且退休年齡長咗，所以有機會到退休都升唔到最高位。廉航可能升得快啲，至於部分海外航空，直頭無得升，因為佢地只會比自己友機會，身為外國人好難出頭。

延伸閱讀：做空姐空少享受自由人生 (續)

文：Suki Wong

Career Advice Career counselling, advice and guidance Select article category Select article category Productivity TipsWorkplace EnglishIndustry StoriesJob Search in Hong KongHR Career SuccessHow to Get PromotedCareer Path PlanningCareer Coaching & GuidanceAdvice Columnist

Select article category

Search Article

Tag: 空服員

【行業內情】 做空姐空少 享受自由人生

Career Advice Career counselling, advice and guidance
Select article category

Select article category

Productivity Tips
Workplace English
Industry Stories
Job Search in Hong Kong
HR Career Success
How to Get Promoted
Career Path Planning
Career Coaching & Guidance
Advice Columnist

【行業內情】做空姐空少享受自由人生