近年即時通訊軟件功能大增，例如新增刪除訊息功能，令早期大家唔小心Send錯Group的尷尬大為減少。

不過，功能有，不代表人人識用，尤其係你老細。

話說在一家細公司裏，員工得十個八個，有次老闆用WhatsApp「媽人」，卻發錯去公司的「大Group」，於是被罵者的錯事膠事、老闆的刻薄語言，全部曝露在所有人眼裏。

本來，Send錯嘢，身手夠快的話，可以搶先在大夥閱讀前刪走，將傷害減到最低。就算遲了，也可以無聲無息刪走錯誤留言，免得眼冤。反正他是老細，冇人敢事後多嘴，大家當時運高睇唔到就算。

偏偏那老細唔識用刪除功能，佢選擇：第二日回到公司，要求所有同事拿出手機，在他面前逐一刪除誤發訊息。

這麼刻意，這麼煞有介事，咪仲Odd仲核突？

這單Case是個別事件，相信唔係太多老細咁小學雞嘅。反而，辦公毒男發現，好多老細／上司鍾意反其道而行……

佢地刻意把鬧人的言論「誤發」到同事群組！目的是「敲山震虎＋震懾」，掟個靚彎來羞辱你！

點解我知老細係「專登」咁做呢？因為好唔好彩，那次被罵的主角：係～我～

我承認，那次是做錯了一點小事，搞錯了報價數目，幾乎令公司賺少了錢 ( 只是幾乎，而且毒男係被人跣的，但這不是重點 )。結果，老闆用上如果唔知還以為我勾佢老婆的惡毒語言來「炳」我。小弟當然只有耍冧再耍冧，道歉再道歉，一粒字也不敢申辯啦。

佢由九點「媽」到我十點，小意思。但估唔到，十點零鐘，佢最初鬧我那段說話，竟然「誤發」到同事群組裏！

掉轉來，尚可說搞錯，明明已罵完，忽然又「Copy」那段字來「Send錯」，可能性低過世界和平囉。

後來，同樣情況，亦有發生在其他同事身上。根本老細係想當住全世界來鬧你，又要扮晒「我冇落你面子呀，唔小心咋」。高招到呢，磁能線到呢。

學某局長話齋，咁嘅老細，我見過，我真係見過！你呢？

以上文章刊於《招職》。

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist