出嚟社會工作，日做夜做冇時停，喺同一間公司一段長時間，慢慢就會跌落comfort zone。「啲嘢做熟曬，穩穩定定咪幾好。」「轉工好麻煩㗎，又要見工。」「出面環境唔好呀。」
一個一個藉口喺心裡面湧出嚟，長期受呢啲藉口影響，甚至自己都信而為真，忽略咗一啲真正需要轉工嘅原因，到發現時已經浪費咗唔少青春。

1. 冇乜機會進步

呢個世界每一日都喺度變緊，我地做嘅工作、吸收嘅經驗如果冇與時並進，結果總有一日好容易被淘汰。例如而家IT行業雖然比較吃香，但係技術就一日千里，今日用緊嘅工具幾年後可能已經好落後；如果公司一成不變，一直都堅持用舊嗰套，員工自然冇機會試到新嘢，進步及發展嘅機會就減少。久而久之，舊嗰套係用得好熟，但出面個世界都變曬，到時人又會有新嘅藉口畀自己：「唉，而家先嚟學新嘢，太遲啦。」結果繼續留喺comfort zone，咁就一世。如果你喺公司做嚟做去都係咁，苦無發展機會，咁就要諗真諗一諗喇。

2. 公司冇個傾得埋

好嘅工作環境喺由人去製造出嚟，就算做嘢辛苦啲，但有一班好同事支持絕對係難能可貴。為咗跑數、為咗功勞、為咗威威，有啲公司嘅氣氛有時會令同事之間難以建立良好關係。但係我覺得返工既然佔咗人生咁多時間，如果同同事關係唔好，畀老細捽完想搵人支持下都冇，簡直係身處人間煉獄。如果你發現你份工做咗一段時間，但係都冇咩邊個傾得埋，唔該唔好死頂，記得對自己嗌唔好，唔好再咁樣委屈自己，諗下轉工啦。

3. 熱情不再

「心灰意冷」呢四個字，我喺Exit Interview從同事口中都聽過唔少次。有啲人喺入職嘅時間，睇得出佢係有一團火，但係Exit Interview見佢嘅時候已經成頭冷水，撻都撻唔著。心中嘅熱情被淋熄嘅原因有好多，可能係因為老細、可能係因為人工、可能係因為公司政策、可能係因為同入職後發現理想與現實嘅落差。當你發現自己嘅努力都得唔到理想嘅回應，自然慢慢就會失去熱情。如果呢個問題喺公司解決唔到，相信你只會越做越頹。呢個時候你需要重新燃點你嘅熱情之火，轉變一下畀啲新衝擊自己。

4. 做緊嘅唔係理想嘅工作

無可否認，香港係一個比較現實社會，好多人一開始都係望住個人工嚟搵工，冇乜空間講理想。「哦，做金融才俊搵到錢吖嘛。」「做sales搵到錢吖嘛。」入行嘅時候都冇諗過自己想要啲乜嘢。但係慢慢做落，你就可能會發現有其他自己更有興趣嘅工作，但因為要放棄自己擁有嘅嘢又冇膽去做新嘗試。其實改變嘅動力只會隨住時間嘅過去而日漸減弱，代價亦只會越變越大。當你呢刻仲有呢個念頭喺腦海入面出現，就係機會喇飛雲！

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist

Select article category

Search Article

Tag: 發展機會

係時候要轉工嘅徵狀