今時今日，人在職場大家都焗住要「好打得」，但手得一雙，Task排山倒海來襲難免愈忙愈亂、愈亂就愈忙，如果你陷入此困局，呢四款手機App幫到你。

1. Any.Do：「To do list」用紙寫不如睇手機 (上圖)

工作一項接一項，唔少人都習慣每日用張紙仔列出「To do list」貼在芒上邊，提醒自己今天需要完成的工作清單。不過用紙仔寫，缺點係無得隨時睇住，而且芒上邊紙仔愈貼愈多，你都搞唔清邊張先係今日的「To do list」，倒不如用手機設定每日「To do list」。

要數最好用的「To do list」手機App，唔少人會投Any.Do一票，呢款App好處係設計夠精簡，仲可以按自己需要分類，甚至把待辦工作Tag比人，對經常要搵同事協力搞掂工作的上班族就最實用，並提供iOS及Android版選擇。

2. Jorte行事曆：公私兩忙用公仔提示今日「節目」(上圖)

每日返工，除了要K.O.大堆工作，還要應付會議、見客及朋友飯局等不同「節目」。雖然手機設有行事曆功能，不過相信你試用過，都可能嫌設計唔夠生動吸引。

想為編排日程增添趣味，不妨試用Jorte行事曆，呢款App吸引之處，除了可以自選背景顏色及圖案，更可以在每日待辦事項加入唔同的卡通公仔，既可以令工作日程變得更有趣，亦方便自己望一望個公仔，就大概知道今日有乜節目，對大頭蝦的朋友就特別實用。

3. MyScript Calculator 2：唔想「篤數」可以點？(上圖)

即使你唔係做會計，間中都可能要計下數，不過手機內置的計數機一味靠篤，好多時條數稍為複雜，篤篤下就唔知計到邊，唔想下下用Excel，有無替代方案呢？

最直接的方法係反樸歸真用手寫，MyScript Calculator 2 厲害之處，係只要在版面寫上算式，就會自動幫你變為數目字兼計數，你更可將答案放在頂部備用，即使寫錯數字，只要直接在數字上劃一劃，錯誤數字就自動刪走，簡單又清楚。

可惜現在只有Android版本；然而，用iPhone或iPad的朋友，亦可以考慮用Soulver，呢個App好處係你可以成行連埋文字輸入，之後就系統就會幫你計數，厲害在外幣兌換、按揭利率、折扣都可以輕鬆應付，夠晒實用。

4. Forest：催谷專注力靠種樹 (上圖)

工作做極唔完，元兇之一往往係你經常忍唔住睇手機，如果你都有此煩惱，不妨試下用Forest呢個種樹App，你可以設定工作專注時間，透過達標來種樹，種成一棟樹即可獲贈金幣讓你購買新品種的樹，日子有功的話，你就可以擁有屬於自己的森林，同時你亦會發現工作效率明顯有改善。

文：Peter Cheung

以上文章刊於《招職》。

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist