同事貓仔為人性格隨和，待人接物都客客氣氣，同大部分同事的人際關係都相處融洽，係大家眼中嘅好同事。不過可能個性太隨和關係，有時會被其他邪惡同事恰到上心口。貓仔有時會好委屈咁同其他人分享自己遭遇，大家都覺得佢要勇敢啲Say NO，但係可能因為性格關係，好多時佢都係後知後覺，被人攞曬著數先知咩事。

貓仔一向同炸薯部嘅主管技安一齊負責招聘新人，佢地經常要合作做Interview。技安同貓仔性格南轅北轍，係完全來自兩個星球嘅人；一個溫純如貓仔，一個惡到似技安。一向以嚟，技安對於同貓仔合作都有微言，甚至會喺面試過程中黑面，令到貓仔非常尷尬。貓仔一向以嚟都逆來順受，心諗多一事不如少一事。但有一次唔同喇，去到一個Moment，貓仔終於覺得佢要爆喇!

話說呢一次都係同往時一樣，貓仔同技安一齊負責去做Interview面試官。坐低問咗幾句之後，貓仔發現履歷表 ( C.V. )有一個地方想了解多少少。

「請問你可唔可以詳細講下你喺茄子公司負責嘅A Project呀？」

Candidate正打算開口回答，技安突然間怒啤咗貓仔一眼，然後同貓仔講：

「人地C.V.咪寫咗囉。」( 其實C.V.冇寫 )

然後佢再同個Candidate講：

「唔好理佢。」

之後繼續自己問問題。兩個Interviewer喺面試當中內訌，你會有咩感覺？應該會幾好笑，但對於Interviewer同間公司嚟講，應該係幾樣衰嘅一件事。

技安喺Candidate面前完全唔比面貓仔，貓仔覺得完全唔受尊重，呢個Moment佢要爆喇！不過，喺Candidate面前爆實在有失專業，所以佢都忍住咗。當個Candidate離開咗之後，佢終於發火，向技安表達強烈不滿，呢次係所有同事見過佢最惡嘅一次，連技安都被佢嚇親沙曬冧，表示下次唔敢。

喺公司入面有啲同事特別好人，對你客客氣氣，但唔代表佢地冇脾氣。只要觸及佢地嘅底線，反彈力可以非常恐怖。平時好少發火嘅人，一發火上嚟真係唔係人咁品。

請照顧別人感受，人地唔係奉旨要對你好聲好氣的。