人類嘅辦公室難免出現明爭暗鬥、利益主義，令惡魔可以有機可乘。佢地喺人類身上埋藏邪念，久而久之拙壯成魔。由於「責任」兩字對於部分人類嚟講特別沉重，令卸膊狂魔喺辦公室裡面經常肆虐。因為佢地嘅真身膊頭呈A字狀，要辨認出佢地其實唔難，不過對於一般經驗不足嘅人類麻瓜嚟講，就唔係咁容易睇得出。肉眼認唔出唔緊要，聽佢地經常講嘅對白，一樣可以分辨到。

1. 你唔提我是你錯
BB小姐喺公司做咗十幾年，正常嚟講佢應該知道曬每一件工作嘅既定程序，不過佢每次都會好唔正常咁唔記得。有一次佢申請文具，第167次問文具偉有咩程序，文具偉好有心機咁答佢第167次，點知BB小姐都係要填漏份form。文具偉問佢要返份form，點知BB小姐化身卸膊狂魔問佢：「吓？你做咩唔提我？」好似第167次唔記得程序都係文具偉嘅錯。

2. 呢單嘢唔係我負責
哥師奶係五人小組嘅一員，有一次佢地一齊攪個event，哥師奶負責帶住星仔攪音響。點知好唔好彩，其中支咪出咗事，攪到老細喺台上面講不出聲。哥師奶即時卸膊狂魔上身：「Check 咪係星仔做㗎。」講到好似佢冇份負責咁。

3. 唔係我idea囉
陳仔做廣告，佢同成組同事開通宵幫個大客度橋。攪咗成晚，佢地終於一齊度咗條絕世好橋。誰不知最後個客唔buy條橋，白白冇咗個大客。老細捉曬條team入嚟照肺，卸膊狂魔又有機可乘，陳仔大大聲講：「呢個唔係我idea囉，我都話咗唔work!」聽到成team人O曬嘴，好似成單嘢佢冇份做咁。

如何應付？

1. 有字有真相
同卸膊狂魔做嘢最重要嘅係做足防禦措施，同佢講傾過嘅嘢都要白字黑字記清楚，千祈唔好畀機會佢地唔認數。例如今日同佢傾完，轉頭send返個email畀佢，有起事上嚟佢唔可以扮唔知。

2. 找個人證
呢個世界最惡嘅人就係賴皮嘅人，講咗可以話冇聽過，出咗email可以話冇睇過。當文字都唔能夠證明佢知道嘅時候，對付賴皮嘅卸膊狂魔就要出動人證。同佢傾嘢要拉埋其他人一齊聽，人證物證俱在，A字膊都要挺返直。

3. 魔鬼在細節
為咗唔可以畀機會狂魔有機可乘，工作每一個細節、每個步驟嘅PIC都要講清講楚。傾完之後用文字紀錄，必要時再搵佢簽名作實。有曬物證之後仲要畀個copy老細，重重保障下，佢想卸咩都冇機會。
 
4. 走為上計
卸膊狂魔非一日煉成，成魔已久依然橫行，證明佢功力深厚，非等閒之輩。如果同佢嘅合作係無可避免就一定要小心行事。最怕嘅情況係抗魔不成，反被狂魔同化。如果一次又一次咁被卸膊，每日工作擔驚受怕，倒不如搵份夾自己嘅工，做返自己。