「開會」基本上返工嘅例行公事，應該得好少部份嘅打工仔係唔使開會。開會嘅目的有好多，可能係跟進項目進度，定期嘅Business update，競爭對手有咩新動向，未來一個月嘅Action plan等等。睇落好似幾好，令到老細同同事可以充分理解公司做緊咩，但慢慢你有無發現，返工大部份時間就拎嚟開會，6點後先可以返埋位做嘢呢？喺呢個Moment，你就會諗：其實開會為咩？

曾經聽過有人講：「開會，係想講下點解要開會。」嚇死人。今次就同大家分享12個貼士，等你嘅時間唔使奉獻晒畀啲無謂嘢度，工作可以順順利利。

1. 取消無實際用途嘅會議

公司同管理層應該要睇返過往一年開嘅例會（例如睇返會議記錄），究竟呢啲會對同事嘅工作有幾大幫助，如果純粹係畀同事講下嘢，不如取消咗佢啦。

2. 拒絕參加唔關自己事嘅會

有啲同事Call會，唔理三七廿一就將成個Department嘅同事擺喺Email loop度叫人去開會（仲CC埋老細）。但好多時，個會得幾個人關事，唔需要咁大陣仗。上司應該審視下有無呢個情況，同時畀同事自由選擇開唔開會。

3. 太多人嘅會，不了

研究發現，愈多人嘅會議愈無效率，多過8個人嘅會係最無效益。另外，如果會入面大部份人只係得個聽字，無任何報告，亦無任何建議，開會亦係浪費大家時間。

4. 一星期起碼有一日係唔使開會

Airbnb就實行咗呢個制度（FYR. 早排仲畀員工Live and work anywhere），公司講明逢星期三禁止開會，畀員工可以安安樂樂做嘢。但如果有得揀，不如一星期淨係可以開一次會？

5. 開緊會，試下企喺度

Call會做決策嗰個企喺度聽，需要報告嘅同事企喺度講，呢個情況同事們嘅壓力會標升，大家會講少啲廢話，效率亦會提高。

6. Set timer

喺HBO總部入面就有呢個Rule，會議需要喺指定時間內完結，得出答案或者結果，員工表示咁樣可以令會議更Effective，與會同事亦會更注意時間。

7. 放棄會議室

開會，唔一定要喺Office，唔一定要喺Conference room嘅，你亦可以選擇喺餐廳，Coffee shop開，有啲公司有Recreation area都係唔錯嘅選擇。研究發現喺非傳統嘅地方開會，可以令人更加投入，而且激發創意。

8. 重新思考開會模式

如果喺30分鐘內，開會仲係一潭死水苦無進度，不如試下End咗個會或者先行離開，去做返啲真係有意義嘅工作啦。

9. Agenda好重要

預先話畀參與嘅同事有咩要傾，等同事可以做好準備，避免啲同事得個殼咁入嚟開會。

10. 盡量減少會議資料

有無見過啲人開會有百幾頁Powerpoint？未開會都嚇死你。資料愈少、愈精準，縮短會議長度嘅機會愈大。有時多都唔代表好⋯⋯

11. 個會有無揸Fit人？

Google嘅員工喺開會嗰陣，一定會問：「邊個係Project owner？/ 邊個做Final decision？」因為如果會議嘅決策人都無參與討論，開完會之後仲要再Report，等決策，只係浪費時間。

12. 全心全意咁開會

如果公司上上下下都跟足上面嘅建議去做，相信日後係無廢會嘅。咁亦希望大家可以用心集中討論，開會唔好碌手機，同時表達下意見，唔好做佈景板喇。