人工及晉升機會
財務策劃師 (
Financial Planner ) 嘅收入，可說是沒有平均數，視乎唔同行業，部分入職者底薪由8,000至15,000元不等，另外再加佣金；有啲更是無底薪，只靠佣金，另會因應表現有季度花紅及年終獎金。表現理想有機會免費參加海外旅遊及行業會議，遊覽美加、南非、歐洲不是夢。
如果考埋認可財務策劃師 ( Certified Financial Planner, CFP ) 資格，根據香港財務策劃師學會會員調查，年收入中位數可達60萬至80萬元，即月薪超過5萬，有25%會員更超過100萬元，即月薪超過8萬。同大部分金融職位一樣，呢行的晉升速度比其他行業快，以挽留人才，表現優秀者有機會喺12個月內晉升至管理階層。
壓力指標
由於呢行好多時無底薪或低底薪，可以話手停口停。跑數嘅壓力、繁忙嘅生活、加上周圍去見客致令飲食唔定時、見客時為配合客人間中難免會接觸煙煙酒酒，壓力都唔輕，要懂得自我調節生活節奏同飲食及作息習慣，才能保持身心健康。
呢行仲要一直搵新客源，好多客都會覺得財策即係呃錢，要懂得沉著應對新客嘅冷嘲熱諷，心理質素好緊要。
增值指標
無論你係屬於邊類公司嘅財策師，一般公司都會提供全面嘅行業培訓課程，以保持員工嘅競爭力，內容多數會涵蓋財富管理知識、保險業運作、金融投資工具、客戶思維、市場銷售概念等，對有志於金融行業發展嘅人絕對有助益。
| 問： |
入職有甚麼要求？
|
| 答： |
任何人就算只係中五畢業生都可以話自己係財務策劃師。當然，如果要推銷某類產品就一定要考獲相關牌照。不過，認可財策師就必需擁有相關知識，一般現時獲聘都需要大學畢業，而且要獲取專業資格，除左考試之外，仲要儲夠實戰經驗，先可以申請成為認可財策師，而且對個人專業操守都有要求。
|
| 問： |
要成為財策師，須具備甚麼條件？
|
| 答： |
最好具備以下4項特質：
- 講嘢叻：由於呢行要經常推銷產品同剖析客人嘅財務需要，準備入行嘅人需要有良好嘅溝通技巧同表達能力，仲要夠大膽主動唔怕醜，先可以主動出擊，搵多啲客。
- 有勇有謀：而且呢行多數屬半自僱人士，對有志建立個人事業，發展成為理財策劃專才，甚至有志成為管理層嘅人至為適合。
- 心思細密：由於工作上需要為客戶勾勒出全面嘅理財藍圖，懂得聆聽、細心、觀察力高，透過留意客人嘅打扮、職業、家庭背景狀況、學歷、談話內容等，了解客人嘅需要同性格，才能為客人設計出最貼心嘅財務選擇。
- 通曉金融產品：了解各種財務產品嘅特徵同優劣，並熟悉個人稅務策劃、風險與組合分析、家庭風險保障、子女教育、退休養老計劃、遺產與信託管理等一系列人生規劃嘅專業知識，先能夠一擊即中，揀選適合客人嘅服務。
|
| 問： |
財策師淨係推銷產品咁簡單？
|
| 答： |
唔係！仲要… …
- 談心讀心：財策師要為客人規劃理財，必先要了解客人嘅真正需要同當下最需要嘅係乜，懂得讀心就最理想不過。除左對住一堆數字包括客人嘅收入同支出、預計退休年齡、退休開支等等無生命嘅數字，同埋熟悉一大堆財務工具外，更重要係同客人傾偈，了解每個客人嘅獨特情況同佢心裏面最想達到咩效果，係想早啲買樓退休？係想短時間身家暴漲？係想留啲錢俾仔女？呢啲都需要財策師用心聆聽。
- 噓寒問暖：財策師要做得長、做得多客，獲得客人信任非常重要，故此閒時要對客人噓寒問暖、大時大節發個短訊祝賀或送上賀禮，間中送些優惠著數，有時分享下行業資訊，出國參加會議務必通知客人，從而建立自己嘅專業形象，令舊有客戶成為自己嘅宣傳工具。
|
| 問： |
點樣為之一個成功財策師？
|
答： |
好多人將
財策師等同賣保險賣基金，其實當初
財策師嘅出現，其意義係更廣，佢地主要分六大範疇，包括支出、稅務、保險、投資、退休及遺產，保險只不過係其中之一，而且外國嘅
財策師係靠提供顧問服務賺取服務費，而唔係靠推銷產品，不過喺香港就被一啲公司濫用到變成Sales嘅代名詞。
不過面對現實，財策師最緊要都係幫到客人賺錢，賺唔到錢就等乞米。根據客人嘅資產狀況同風險偏好，提供全面嘅分析同建議，選擇適合嘅理財方案，以確保客人資產得以保值同增值。
| 問： |
唔使返工好自由？
|
答： |
視乎係邊類公司或機構嘅財策師，有啲機構
財策師係屬於編制之內，仍然需要每朝或每周返去開會，但大部分
財策師每日嘅工作主要係出外見客，工作時間甚具彈性。不過，唔好以為唔使返公司，時間就好好用，因為要遷就客人嘅工作時間，好多時都要人地放工或周末先開工，好難同屋企人食餐晚飯或享受一個正常嘅周末。再者，呢行手停口停，早收工意味見客量少，真係唔好恨。
見客之外，仲有好多文書同資料搜集嘅工夫，仲要經常留意政經時事同金融新聞，除咗幫助決定投資策略外，更係同客人吹水嘅材料。
| 問： |
咩機構會請財策師？
|
| 答： |
根據香港財務策劃師學會資料，2017年全球CFP專業人士超過175,000名，香港則有超過4,500名，香港CFP數量名列全球第七位。佢地主要從事銀行 ( 51% )、其次係保險 ( 28% )、獨立理財顧問 ( 8% ) 及資產管理 ( 7% )。好多大機構都會請財策師，但無奈人才供應不足，所以佢地願意開出優厚嘅條件，亦願意花資源培訓新人。
|
| 問： |
財策師前景如何？
|
| 答： |
香港金融行業一向著重於產品銷售，對於財務策劃 ( Financial Planning ) 仍然處於雛形，尤其係香港中產人士對高質素嘅財富管理需求只係初起步，而且仍然處於非常基礎嘅層次，故此對財務策劃行業嘅需求潛力十分強勁。另一方面，隨住人文質素提高同財富累積，大眾對財富管理嘅觀念有住翻天覆地嘅改變。我地好多同行都相信，除左賣產品之外，未來將會更加多轉向賣服務，財策師更需要想客所想，呢個行業將會愈做愈專業，愈做愈有質素。而本地理財產品供應自由，又面向國際，加上內地步向小康，有資產人士愈來愈多，大中華市場潛力亦不容忽視。
|
