成日聽到人哋話老細對自己有幾好，自己都想有個咁嘅老闆。但係啲老細好成咁，你唔覺得有問題咩？尤其是喺中小企打工，老闆對你愈好愈照顧證明咗啲咩啊？咪就係佢哋永世都唔會想加你人工囉！

呢啲其實就係所謂嘅糖衣陷阱！其實好多時打工同拍拖真係好相似，如果對方物質上滿足唔到你嘅話，要留住你個心留住你個人就要做好多打動你嘅細微事令到你唔捨得走。

老闆始終都係老闆，變起面上嚟仲快過四川啲變面大師！心軟嘅人好多時就死喺呢度，包括我自己在內！老闆同你訴苦唔好以為當你係知己，唔覺意有時出於好意幫咗佢哋，好似幫公司出住錢之後Claim返咁樣。當你要同公司攞返錢嘅時候又會話要跟程序，一陣間又話會計搞錯咗，最後就個個月都拖數。

如果老闆仲不時請你食飯又請你飲酒，你又估吓係咪真係咁好？分分鐘之後有事要搵你嘅時候，就會講聲拍爛檔、幫下手、唔好意思等嘅字眼一年全包出嚟要你做返好多Extra嘅嘢。去到年尾諗住老闆好人會加你多啲人工，但係好老實講你估吓又有幾多所謂嘅好老闆會加你好多錢？

年年自己講就話呢度搵唔到錢要搵過第二份工，但係心入面嗰句就驚住喺第二度搵唔返個好老闆，又唔係要發達，過得去就唔好轉啦。最後嘅結果就係最終有人上台攞老人牌嘅同時，你嘅人工同身高一樣，過咗發育期就停咗響度囉！你話呢啲係咪叫做愈快樂愈墮落呢？