「唔怕狼一樣嘅對手，只怕豬一樣嘅隊友」，呢句說話大家成日都聽到。你話如果喺自己嘅部門或者自己條Team入邊真係有一個或者以上豬隊友，恐怕你會做到嘔血。如果身邊有多一兩個豬隊友，必定令自己 ( 假設自己唔係人地嘅豬隊友 ) 嘅工作量以倍數增加，而且孭鑊嘅機會亦會相應增加。

呢啲情況最常見到係做Project或者做Pitching嘅時候，豬隊友總會經常做漏嘢或做錯嘢，最大鑊嘅係自己唔知！喺大家分頭工作嘅時候，你真係無時間顧到其他人究竟喺度做緊乜嘢及進度！當老細睇返成個Presentation嘅時候，有任何嘢唔妥就會鬧到狗血淋頭。我真係試過好多次唔知點解用心用力將個Proposal做得盡善盡美，但係次次都被人打回頭話要改。老細同我地講：我唔知你哋邊個負責邊一部分，但係成個Presentation完全做唔到位，咁我點樣交比個客啊？你地同我重新做過！

係呢個時候，我真係激到嘔血，真係想知道邊一隻豬做錯晒啲嘢累到成條Team要重新做過！咁都唔算最差，最差嘅係做錯事又唔認，當自己冇做過一樣扮晒嘢嗰啲！真係自己死都要攬埋大家一齊死嘅豬！

其實豬隊友都分好多種嘅！有啲就係傻頭傻腦、白白痴痴咁做嘢，但又做錯晒都唔知！有啲就係同佢講到明都會做錯，呢啲真係冇得救！要個個隊友都好似英雄聯盟咁勁揪，我諗真係要係電影世界入邊先會有！有時消極啲都會諗下不如連自己都做埋一隻豬，因為幾豬都唔使死咁我做咩要咁醒呢？

以上文章刊於《招職》。