唔知大家有冇睇過或者聽過國王的新衣呢一個故事？簡單啲來講就係講緊一啲知少少扮代表、自以為是、以為自己好醒但係其實就係豬頭炳嘅老細！

呢啲老細有個共通點，就係經過佢自己嘅大腦聽到外邊講嘅說話，覺得啱佢聽就以為呢一個就係定律！完全未經過思考，佢哋就會用呢一套拎返去公司，對住自己員工分享呢一套所謂嘅大智慧，完全冇經過思考係啱定錯。白癡都識講啦，人哋講就信，你估你係細路仔咩！

咁樣其實都好小事，但係有時呢啲老細調返轉將自己員工嘅傑作拎出嚟，到處表揚同人哋講係自己嘅傑作。好多時候佢哋都冇細心睇清楚員工交比佢哋嘅嘢，佢哋只會喺大標題大方向略略睇過冇問題就拎出街！當人哋問佢一啲細節嘅時候，其實佢就啞口無言，比人哋Chok一Chok，佢就失晒魂淆晒底！返嚟仲要閙返啲細嘅點解唔講清楚。大佬呀！咁簡單嘅問題寫嗰個梗係知道啦，如果人哋問到我我梗係識答啦！係你自己懵盛盛乜都唔知攞住份嘢耀武楊威以為自己好勁，唔係你做嘅嘢你又點會知呢？

打左咁耐工，其實去到邊都有呢啲咁嘅老細，都唔知點解佢哋可以坐到嗰啲位？不過都我地做到嗰啲位嘅時候，辛苦咗咁耐，係咪會變到好似佢哋咁由得啲細做，做起咗自己就拎出去吹，慳水慳力慳時間呢？我諗我自己就唔會囉，面子緊要呀嘛！

以上文章刊於《招職》。