【職場心理戰】見工畀HR壓價應該點部署？| CPjobs

作為打工仔嘅我同你，都會明白「期望薪金（Expected salary）」永遠同現實有實際距離。搵工轉工已經辛苦，見到成功在望仲要「講數」，真係心很累。面對「壓價」係咪一定要硬食，企硬係咪等於要同個Offer講再見？以下呢6招，可能幫到你！

1. 做好心理建設

壓價係HR 99%一定會做嘅事，千祈唔好畀佢嚇窒，打擊自信心。而且為咗達成目的，講嘅理由可以係層出不窮：

傾Offer最緊要有信心，打定底知道對方九成會壓價，預先諗下點樣見招拆招。見得工，講得人工，都基本符合職位需要，頂住！

HR壓價還壓價，打工仔都要睇下自己開嘅價現唔現實，係咪貼緊「市價」。CPjobs早前做咗個薪酬調查，入面有各大行業、唔同職位嘅薪金水平，可以畀你做個參考，等你唔使畀HR大到。另外，如果有親戚朋友做緊呢個位，又唔介意話你知大概人工，咁就更好。

知道咩市價，同時要評估下自己嘅能力同工作經驗，做咗幾年嘢Keep住Update新知識同埋單單識一範工作，個叫價都可以好唔同。而如果你初出茅廬，經驗未夠，就要做多少少心理準備會畀HR壓價，唯一可以做嘅，就係接受幾低，畀個清晰嘅底線自己。

3. 嘗試談判

老實講，去到傾人工階段，對方對你嘅工作能力同表現應該幾滿意，諗住請你加入佢哋嘅大家庭，唯一未有共識，就係人工。當你有良好嘅心理建設同埋做足功課之後，HR壓價威力減半，就可以嘗試談判（當然唔好太囂張）。

先多謝對方畀個Offer你，再講多次自己嘅經驗可以點應用喺未來嘅工作，有咩新嘅諗法可以協助公司，總之畀人一個感覺：你值！

有啲HR可能不為所動，好堅持要壓價，喺呢個時候，可以試下直接問人事部經理公司嘅Budget係幾多。雖然唔一定講，但肯講都係一個參考（都差唔多請你，應該係真嘅。如果老作一陣做咗同事知道真相仲尷尬）。

既然一開始就預咗對方壓價，你嘅期望薪金應該預返少少水位畀佢劈下，同時設定一個你可以接受嘅壓價幅度。喺一連串嘅有來有往，你可以試下「一人讓一步」：還價，還一個相比最初已經低咗嘅價，而自己係接受到。對方見你肯讓步，應該都唔會再為難你嘅。

如果以上咁多招都無用，HR仍然企硬，唔使黑面發脾氣，盞令到個氣氛同印象更差。不妨表示會考慮下，同時表示見緊其他工，睇下邊個急啲。當然，想轉工嘅你，可以花少少時間考慮，所有嘢都係Give and take，勉強自己接受一個爛Offer，唔開心嗰個一定係自己。機會唔係得一個嘅！