身邊唔少朋友打咗幾年工之後，難免想純粹抖一抖，但又怕手停口停。如果你都有此難題，不妨考慮 一下職場三大潛力「Hea工」。

共享工作間「看更」

共享工作間供過於求已成為近月地產界的熱門話題，正因為共享工作間泛濫式地進駐各工貿區，亦製造了大量的「Hea工」機會，就係共享工作間「看更」。

所謂共享工作間「看更」，名堂可能係項目主任、營運經理或行政助理，但實際上都係幫老闆睇住個場，間中處理一下水、電、客戶影印及Fax，以及飲品零食補給事宜。要搜尋有得「Hea」的共享工作間「看更」工，就要識睇條件。通常位處上環、灣仔、油尖旺、觀塘等熱門地區的共享工作間，因為好生意所以「看更」都幾忙。但一些位置偏遠，又或屬於二線地區卻競爭者林立，老闆們本身又有正職少返來，因為生意差，一日只有幾名用家，做「看更」就可以好「Hea」，聽聞更有「看更」可以上網睇戲打機玩足一日，日子過得快活。

工貿區Fitness教練

人人講健身修身，在健身中心目測教練們都非常忙碌。不過一如共享工作間，一些創業生手在二、三線地區開設的健身中心，其實亦製造了一些健身教練「Hea」工機會。

這類健身中心，老闆原來的如意算盤係附近有新落成的辦公室大樓，應該有不少白領客。但他們忽略了二、三線工貿區距離市中心太遠，在區內返工的白領客為方便行街食飯，寧願出城做Gym，加上除了這幾幢辦公室大樓，其餘都係貨倉，結果過千呎地方的健身中心經常小貓三四隻。

熱愛健身的朋友，投身這類健身中心除了好得閒，另一收穫係有大量時間鍛鍊自己，操得更fit休息夠了，就更有條件轉到人氣健身室搵真銀。

政府外判工

今時今日政府請合約工，有媒體都會用搶手筍工來形容。但有一類掛上「政府」牌頭的工，不少人都會視為搵笨，便是經Agency請的政府外判工。

客觀睇，這類工收入被Agency抽了一轉水，福利欠奉，年假又喺合約完結後計錢，辭職通知期請假又要扣錢，確實係幾豬頭骨。但正因為係外判工，上司又怕你辭工要再In人請人，基本上唔敢對你苛刻，而且你請無薪假通常都會批。更重要係，請外判工往往係因為某個特定Project，Project草創時其實無乜嘢做，Project就來完結時又係無乜嘢做，一年合約實際上較忙都係得四個月，有得「Hea」又有萬幾二萬收入，用來當長工與長工之間的攝期工都有一定吸引力吧。

以上文章刊於《招職》。