這篇文章從硬件出發，分析一下怎樣符合性價比起動「斜槓」生涯。

三路入手  解決土地問題
你返全職工時，公司提供桌椅辦公是理所當然的事情，但跳出「Comfort Zone」後，你首要解決就係辦公空間的難題。

最簡單直接方法係Home Office，但與家人同住，你可能要在客廳工作，還要面對家人長開電視、閒談、打牌的聲浪，工作效率難免大打折扣。如果你已自立獨居，雖然免受雜音之苦，但一個人躲在家中工作，很容易會分心做其他無謂嘢如打機、煲劇，令打自己工急變成唔做嘢狀態。所以考慮Home Office雖然可以慳盡土地成本，但就要認真考慮個人的自律能力。


即使租一張Hot Desk辦公，不同的共享工作間嘅租金都唔一樣，Slashie要懂得格吓價，兼且選擇真正能滿足自己要求的地方。
 

唔揀Home Office又想靈活租地方，最就手方法係租共享工作間Hot Desk。不過唔好睇少租Hot Desk的成本，現時一些名牌共享工作間的Hot Desk，月租可以貴至四、五千銀一個月，所以揀Hot Desk必須要格價。如果你根本唔需要請客戶或合作伙伴上來共享工作間開會，亦不用天天穿梭於港島核心商業區，你便可以放下虛榮心，改租九龍工貿區的共享工作間，每月租金開支即可縮減到一、二千元「正常」水平。

不過租Hot Desk，你要有心理準備做「吉卜賽人」。皆因工貿區受歡迎的共享工作間，通常中午過後會有嘈過街市兼無位座的問題，你捱了幾個月就可能忍唔住搬。找到間新開張人流較少的共享工作間，享受三、四個月寧靜期後，這個地方亦可能因為蝕得太勁關門大吉。所以鍛鍊唔怕搬心態，才可以適應租Hot Desk生涯。


唔租Hot Desk，可以慮與朋友合租一個小型Studio，以節省工作間的成本。
 

除了Hot Desk，與朋友合租蚊型工作室亦是符合性價比的選擇。受惠過去幾年多區工廈積極發展蚊型工作室項目，令這類單位供應大增。現時葵涌、荃灣的蚊型工作室單位，月租平至2,200元至2,500元有交易，找多一、兩位Slash族合租，土地成本就較租Hot Desk更經濟，並可以擁有一個自家工作室，有助提升接Job的專業形象。

電子架生要「做到嘢」
全球掀起「斜槓」熱潮，電腦生產商瞄準此商機，積極推出標榜輕巧的「專業級」平板電腦，以吸引Slash族購買。


做得Slashie，與外界時刻保持聯繫是十分重要的，因此要為自己制訂一套流動上網方案。
 

然而認識不少購買「專業級」平板電腦工作的Slash族，他們捱了一段時間後都死死氣改用傳統手提電腦，因為平板電腦雖然輕巧，但在工作上仍有不少限制。超輕的手提電腦亦有類似問題，輕巧的代價就係運算能力及接駁位有限，直接打擊生產力。

Slash族不時要揹着手提電腦行走，但選擇電子架生時須留意輕巧及實用上作出平衡，始終係用來工作，手提電腦擁有中上的運算能力及電池續航力才較穩陣。

除了手提電腦，流動上網亦是一個難題。唔想下下要找到有Wi-fi的Café才可以工作，最好先升級自己的數據Plan，讓手機可以隨時變身成為Hotspot，又或索性買多張數據卡及Wi-fi蛋，作為隨身流動上網裝置，方便自己可以成為隨時處理工作的專業Slash族。

文：Peter Cheung