近年朋友知道我會幫人執CV之後，大家都封咗我為「CV化妝師」，而家佢哋 send CV出去前都send咗比我，之後再打電話嚟一個「pre-interview」，仿彿我就係佢哋嘅HR一樣。其實如果要執CV執得好，改grammar 都係其次，重點係一定要同佢哋傾一個電話，了解佢哋嘅背景同取向，再睇埋份工嘅 JD (job description) ，先能夠對症下藥。

早前收到一位朋友嘅電話，佢搵咗工半年都未有聲氣，於是send咗份CV比我診症。Toby 行年 30，現職senior executive已經有5年，因公司內部問題令「冇得升」已成定局（簡單講，老細唔走，你一日都冇得升），所以諗住辭職。了解之下原來Toby 2017年中已經開始send CV搵工，但久久未有回音。睇完佢份CV就覺得有少少唔對路，因為佢犯咗好多人都犯嘅「CV三大通病」。

太著重學歷
其實個人履歷嚟講，學歷主要喺剛剛出嚟工作初時較為有用，當你工作一段時間之後，學歷就慢慢變得唔太重要。取而代之，工作上嘅成績同獎項，或者係其他工作以外但相關嘅經驗，先係你之後CV嘅重點。工作多年，有經驗、有功績，一定重要過學歷，再過多幾年學歷開始冇乜人會理，知道你有讀過書就足夠。所以如果你好似Toby咁，已經出嚟做野7-8年，其實學歷呢一 part 唔需要放太前，可以放喺工作經驗之後，亦唔需要花太多墨水談及讀書時嘅豐功偉績，輕輕帶過就可以。 

下一句你可能會問，「工作以外但相關嘅經驗」係乜野意思。其實同你有同樣學歷或工作經驗嘅人，喺市場上冇一千都有幾百，所以一定要靠唔同嘅事情去表現自己，先能夠喺HR 同老細面前突圍而出。舉例，有啲朋友間唔中會客串做event 司儀，呢啲放入CV其實係有啲幫助，因為把口叻其實去到邊都有用，喺公司或者對客present更加有幫助。而我工餘亦會寫/ 諗下marketing/ business proposal，當練習之餘亦會send比相關人事討論一下、碰下運氣，呢啲proposal 到 interview 時就可能大派用場。當然，千萬唔好將一啲太離題嘅事攞出嚟講，試過有人中學時做cheerleader 都用好多筆墨去講 / 寫，呢啲就盡量可免則免。

份CV太template
相信好多人都習慣download template之後再改，其實呢個都唔係問題，的而且確，CV由零開始寫起，對好多人嚟講都係好艱辛嘅事，所以大部份 interviewer 同HR 都接受大家用template改。但有一點要注意，記住改template時唔好只係改內文而唔改其他地方。好多人習慣用自己去遷就份template，其實每個人、每份工嘅情況都有異，所以唔同section先後嘅排序、落墨嘅多少、表達嘅格式等等都要「由自己出發」。如果情況許可，間唔中亦可以加少少infographic 去表達，令感覺冇咁悶、冇咁template。

如果大家厭倦漫無目的地將幾份CV格式剪剪貼貼的話，建議可以試下去LinkedIn望下一其他人嘅寫法，外國有啲好pro、成日轉 / 搵工嘅 job hunter，佢哋有啲寫CV簡而精，有啲又會寫得長篇但唔會累贅。不過有兩點要記住，第一，LinkedIn 嘅格式唔可以完全放入CV用，兩者係有少少唔同；第二，當你睇朋友LinkedIn時，有啲情況之下佢係會知你睇佢LinkedIn，所以要小心。

一份CV多用
多數人習慣將同一份CV send哂去所有公司，其實咁樣唔係太好，亦唔係太pro。就算份份工嘅JD 都係差唔多，但或多或少都會有啲唔同。每間公司嘅老細/ HR出JD時都有自己一套慣性/ 公司culture，有時呢啲慣性喺JD 內係有跡可尋，如果寫中佢口味的話，成功率就會相對地提高。舉個例，JD內有提及過、或者一啲行內重要嘅keywords，可以的話最好放返入CV裡面（當然唔好全部都一無一樣copy and paste，有時都要rephrase 一下），再依JD 嘅先後次序，配合自己嘅情況，選擇自己嘅強項加以放大，而呢個skill 喺 interview時都有幫助。

其實老細/ HR 一日有幾十份CV要睇、幾個 interviewee 要見，通常第一眼睇CV 時都係快快scan，之後揀幾份較為合適嘅CV出嚟再仔細考慮，或者pass比老細過目。所以呢啲keywords嘅目的其實係想令佢哋嘅眼球停下來、留下印象。

寫CV 時盡量唔好成日諗「搵工、搵工、搵工」，亦唔好當係一種例行公事，咁樣好難寫得好。其實寫CV 係一種表現自己嘅藝術，唔好當佢係交代身世嘅「身世紙」，要人哋記得你，先係呢個藝術嘅重點。