Appraisal，你今年做咗未？每年到咗年尾，又係總結大家工作上嘅戰績嘅時候，老細們又收到人事部send出嚟嗰張水蛇春咁長嘅工作評價，填佢地對下屬嘅成績單。一般嚟講，老細都會趁呢個時間捉下啲下屬入房傾下計。不過，Appraisal 做得多，就算對住唔同嘅老細、份Appraisal 填得好唔好，你會發現有幾句對白都幾常見。

1. 你明啦...生意難做呀...

「你明啦...生意難做呀...」聽到短短呢8個字，你應該已經明白你份人工嘅命運。你本來可能鴻心壯志，想要求老細加你人工，一聽到呢句就已經知道無運行。生意難做？即係又要共度時艱啦...老細，7年又7年，你呢句都講咗好多年，加少少當鼓勵下都好吖。根據非正式統計，呢句對白係最容易引發暴力事件嘅對白。打工仔聽到之後會好想打老細，無奈又唔敢出手，結果可能會將怒氣轉移到其他地方，例如啪斷平時返工用嚟充飢嘅百力滋，又或者發洩喺無辜嘅比卡超公仔身上，最差嘅情況甚至係返到屋企引發家暴。好想同各老細講一句：講定唔講，諗清楚先好講。

2. 你工作表現幾好，不過...

呢句係老細想你舒服啲咁幫你檢查肺部（俗稱照肺）嘅經典開場白。「我覺得你表現幾好...」首先讚一讚你，令你放下戒心先，然後「不過」呢兩個字一出場，成間房嘅氣氛就會急轉直下，由熱情嘅夏威夷，瞬間轉地球轉咗去冰冷嘅北極。如果前面係讚緊你，「不過」之後通常會係一堆訓示或者責備，然後你會發現原來自己呢一年值得老細欣賞嘅地方係有1分38.81秒，而自己做得唔好嘅地方有1小時49.67秒。遇著呢種多責備少鼓勵嘅老細，做完Appraisal出嚟咩士氣都冇曬。

3. 講下來年大計

有種老細叫特別鍾意講下自己嘅大計，Appraisal開始後一分鐘，你心裡面就有後悔聲音，因為佢已經唔記得做緊Appraisal。由呢一分鍾開始計起春風秋雨間，間房已經變成佢嘅演講台，你要做嘅就係乖乖地坐喺度聽演講。最有挑戰嘅地方就係唔可以瞓著同埋要畀反應，否則佢可能又記得做緊Appraisal，轉頭扣返你幾分。喺發表大計嘅1小時後，佢可能終於記得自己做緊Appraisal，同你講聲，你份Appraisal我填咗，無咩問題返出去做嘢啦。你一分鐘發言機會也沒有...

4. 睇得起你先搵你做

當老細為你來年訂立大計嘅時候，聽到呢句「睇得起你先搵你做。」，作為一個上進嘅好員工，應該士氣加10點，嚟緊一年一定會勇往直前，做到最好。但係，如果你已經唔係第一年聽呢句對白，而且已經聽咗好幾年，同時又發現過去幾年都做到隻積咁嘅樣，老細都冇乜表示，你應該唔會再相信佢嘅說話。好想同佢講一句：「不如下年你自己做埋佢啦。」