成日都聽到身邊好多朋友鬧自己老細，有時真係鬧到好不留情面，好老細彷佛已經喺呢個地球上絕種。

老細唔易做，做個人人稱讚嘅老細就更加難，有啲老細夾喺上層同下層之間，其實真係唔易做。我諗呢個世界冇一個人係完美，作為同樣係地球人嘅老細都總會有佢嘅缺點。不過一個真正嘅好老細，始終係會有一啲特質值得我地繼續為佢效力。

1. 教你世界通行嘅技巧

我有位朋友嘅老細，佢都好中願意、好有耐性咁教導下屬，不過佢教嘅往往都只限於公司內部嘅程序或流程。例如公司個系統點用、某種文件要簽幾多個名、做啲咩要點樣申請等等，全部都係內部嘅工作流程嘅濕碎嘢。久而久之，佢發現識得嘅都只限於喺公司內部應用嘅知識，原來自己一直都學唔到有用嘅技巧。

一個真正會教你嘢嘅老細係會教你一啲世界通行、能夠令你成長嘅能力或技巧。例如可以係溝通、領導、談判、銷售呢啲軟技巧，又或者係一啲如Excel應用等呢啲實用技巧。佢甚至會同你討論人生道理，幫你搵出你個人嘅發展方向。喺需要嘅時候佢會好似一個Mentor咁幫助你，引導你成長並走向成功，真正願意幫助下屬成長嘅老細先算係好老細。

2. 心口嘅闊度

唔好諗衰嘢，心口嘅闊度係講緊你老細嘅胸襟。有啲老細心胸狹窄，你批評過佢一次都會記你一世；年頭犯嘅小錯誤，年尾做Appraisal都會拎出嚟講。廣闊嘅胸襟係一種心態，接受別人對自己嘅批評，不計較下層偶爾嘅犯錯，甚至願意協助佢下次做得更好。佢希望你有朝一日可以叻過佢，咁佢就可以功成身退。

3. 膊頭有承擔

作為一個老細，膊頭嘅結構就變得特別重要。如你老細個膊頭成「A」或「H」字型，咁你就大鑊。有功就自己攞，有鑊就下面孭，跟著呢種老細都係早走早著。一個有膊頭嘅老細願意為自己嘅團隊負責任，喺佢手底下你唔會覺得孤軍作戰，因為你老細永遠喺你背後撐你。

4. 聆聽你嘅意見

有種老細比較鍾意自己喺心裡面做曬決定之後先去通知所有人。表面上會問下意見但其實只係循例做個樣，冇人可以改變到佢。另外有一種老細係會有一個大方向，然後再去集思廣益，聆聽意見再作決定。遇到個肯花時間聽下屬意見，唔會當你嘅說話耳邊風嘅老細，一定要好好珍惜。

5. 識得催你收工

作為老細就梗係想啲同事花多啲時間喺份工上面，最好就晚晚OT、假期都返工，將全副心力花曬喺公司。但有種老細就明白Work life balance嘅重要，每個人都有屋企、每個人都應該有屬於自己嘅私人時間，見你夜咗收工可能會催你快啲返屋企。唔知點解，識得叫人收工嘅老細特別可愛。